Փետրվարի 10-ին Լոս Անջելեսում վախճանվել է սփյուռքահայ բեմադրիչ, երգահան, դերասան, բանաստեղծ, նկարիչ եւ սցենարիստ Սարքի (Սարգիս) Մուրադյանը: Ծնվել էր 1931-ին Բեյրութում, Մեծ եղեռնից փրկված որբերի ընտանիքում (հայրն Ադանայից էր, մայրը՝ Մարաշից): Հաճախել է Բեյրութի Սուրբ Նշան եկեղեցու տարրական դպրոցը, այնուհետեւ՝ ֆրանսիական քոլեջը: 16-17 տարեկան հասակից նվագախումբ է ունեցել, նվագել համայնքային միջոցառումներում: 1946-ին ֆրանսիական «Պատենտ մարկոնի» ձայնագրման ստուդիան թողարկել է նրա առաջին ձայնասկավառակը՝ «Սիրեցի քեզ» եւ «Մոռացար զիս» երգերով: 1952-ին Մուրադյանը Բեյրութի երաժշտանոցի հայտարարած պարեղանակների մրցույթում գրավել է առաջին տեղը՝ իր գրած մամբոյի երաժշտությամբ եւ իրավունք ստացել ուսանողական փոխանակման ծրագրով մեկնելու ԱՄՆ:
Ուսանել է նախ Բոսթոնի երաժշտանոցում, ապա 1961-1964 թթ.՝ Լոս Անջելեսի թատերարվեստի, կինոյի եւ հեռատեսիլի ակադեմիայում: Լոս Անջելեսում 1963-1973 թթ. ղեկավարել է «Հայ թոնզ» նվագախումբը: 1967-ին նրա ջանքերով բացվել է Լոս Անջելեսի առաջին հայկական հեռուստածրագիրը, իսկ 1968-ից ղեկավարել է «Հայկական ռադիոժամը»:
Իր բանաստեղծությունների հիման վրա Սարքի Մուրադյանը գրել է 150-ից ավելի երգ, ձայնագրել՝ 60-ից ավելի երգ, որոնցից ամենից տարածվածը «Երջանկության արցունքներն» են: 1978-ին Նյու Յորքի երգի համաշխարհային փառատոնում «Լիբանան» երգի համար արժանացել է հատուկ մրցանակի: Բաղդոյի դերով նկարահանվել է «Արյունապարտը» հայկական ֆիլմում (ԱՄՆ, 1964): Որպես բեմադրիչ նկարահանել «Երջանկության արցունքները» (1974), «Սիրո խոստովանություն» (1978), «Սասունի քաջեր» (1975) հայալեզու կինոֆիլմերը:
Հեղինակ է նաեւ անգլերեն ֆիլմերի՝ «Գործակալությունը» (1969), «Աբդուլլահ» (1976), «Ոստիկանը, որ Աստված էր խաղում» (1977), «Մուսա լեռան քառասուն օրը» (1982), «Ալիսիա» (2001) եւ այլն: Նրա ֆիլմերում նկարահանվել են ամերիկացի ճանաչված դերասաններ Ջեք Փալանսը, Լանա Վուդը, Փամելա Շափը: 2016-ին պարգեւատրվել է ՀՀ Մշակույթի նախարարությոան ոսկե մեդալով:
Սարքի Մուրադյանի որդին է երգիչ Քեւին Ջորջ Մուրադյանը, որը 1989-ին Երեւանում հանդես է եկել համերգներով, կատարել նաեւ հոր «Իմ Հայաստան» երգը:
Ա. Բ.
