Ընդդիմությունն ասում էր՝ սա միակողմանի ապաշրջափակում է, Հայաստանի համար ոչինչ չի ապաշրջափակվելու, Հայաստանը մնալու է շրջափակման մեջ, Հայաստանը միակողմանի զիջումներ է արել, ապաշրջափակում միայն Ադրբեջանի համար է լինելու, իսկ հիմա իրենք քննարկում են, թե ցորենը որ կարգի է։ Այս մասին այսօր լրագրողների հետ զրույցում նշեց ԱԺ փոխխոսնակ Ռուբեն Ռուբինյանը՝ անդրադառնալով ընդդիմության այն հայտարարություններին, որ իշխանությունն Ադրբեջանի տարածքով չորրորդ կարգի ցորեն է ներկրել և գլուխ է գովում, թե ապաշրջափակում է եղել։
«Սա, կարծում եմ, արդեն իսկ խոսուն է։ Իսկ ընդհանրապես, ես ցորենի մասնագետ չեմ, երևի էկոնոմիկայի նախարարությանը հարցնեք։ Բայց ես չեմ կարծում, որ ինչ-որ անհատ ձեռներեց պիտի ուզենա ներկրի ցորեն, որն իր նպատակին չի ծառայում։
Մեկ էլ, Ռուսաստանից եկած ցորենի մասին ի՞նչ են ասում, նորմա՞լ ա, որակը բավարարո՞ւմ է իրենց»,- հարց հնչեցրեց նա։
Հիշեցնենք՝երեկ պարզ էր դարձել, որ Ղազախստանից Ադրբեջանի տարածքով Հայաստան բերված ցորենը չորրորդ կարգի է, այսինքն՝ անասնակեր է, իսկ էլի Ադրբեջանի տարածքով Ռուսաստանից եկածը՝ բարձր կարգի։
