Գուցե նաև դիտավորություն կա, որ հայկական կողմը որևէ պատրաստություն չի տեսել՝ կանխելու ադրբեջանցիների կողմից երկու հայ զինծառայողների առևանգման դեպքը։ Սա այն դեպքում, երբ կարելի էր կանխատեսել, որ Ադրբեջանը փորձելու է նոր գերիներ վերցնել՝ նրանց փոխանակելու ապրիլին ՀՀ ներթափանցած ադրբեջանցի երկու զինծառայողների հետ, Azg.am-ի թղթակցի հետ զրույցում ասաց ռազմական փորձագետ Կարեն Վրթանեսյանը։
«Ադրբեջանն ընդունել է, որ երկու հայ զինծառայողներին ինքն է բռնել (իհարկե, չեն ասում առևանգել, անունը դրել են դիվերսիա), բայց ակնհայտ է, որ նրանք առևանգվել են ՀՀ տարածքից։ Ցավոք, սա ոչ առաջին, ոչ էլ վերջին դեպքն է։ Ընդ որում շատ արագ դիվերսիոն գործողության հոդվածով քրեական գործ է հարուցվել, և ինձ թվում է՝ հայ երկու զինծառայողին շատ արագ կդատեն։ Սա իրենց կողմից սիմետրիկ պատասխան է երկու ադրբեջանցի՝ իրապես մարդասպաններին Ադրբեջան վերադարձնելու ուղղությամբ։
Ընդ որում՝ վերջիններս ոչ թե մոլորվել, այլ կանխամտածված անցել էին հայկական կողմ և հպարտությամբ ու գիտակցված կերպով մարդ սպանել (խոսքն ապրիլին Հայաստան ներթափանցած ադրբեջանցի երկու զինծառայողներից Հուսեյն Ախունդովի մասին է, որը սպանել էր Զանգեզուրի պղնձամոլիբդենային կոմբինատի պահակին՝ խմբ.)»,- ասաց Կարեն Վրթանեսյանը։
Ռազմական փորձագետի խոսքով՝ ինչպես ՀՀ վարչապետ Նիկոլ Փաշինյանի համաձայնությամբ 2014 թվականին բանտից ազատ արձակվեցին և Բաքվին վերադարձվեցին 17-ամյա Սմբատ Ցականյանին սպանած և 37-ամյա Կարինե Դավթյանին հրազենային վնասվածքներ հասցրած ադրբեջանցի դիվերսանտներ Դիլհամ Ասկերովը և Շահբազ Գուլիևը, այնպես էլ այժմ փորձ է արվելու հետ ստանալ ՀՀ սահմանը հատած ադրբեջանցի երկու զինծառայողներին։
«Սա ակնհայտ է, և հաշվի առնելով, որ այս թեման կար, պետք էր լրացուցիչ միջոցներ ձեռնարկված լինեին՝ շատ լավ իմանալով, որ Ադրբեջանը փորձելու է ինչ-որ բան անել»,- ասաց Կարեն Վրթանեսյանը։
Հիշեցնենք, որ ՀՀ ՊՆ N զորամասի զինծառայողներ Հարություն Յուրիկի Հովագիմյանը և Կարեն Աշոտի Ղազարյանը մայիսի 26-ին` ժամը 18:30-ին, «Կամազ 43114» մակնիշի ավտոմեքենայով նույն զորամասի պահպանության տեղամասի՝ ՀՀ հարավարևելյան ուղղությամբ տեղակայված մարտական դիրքերից մեկին սնունդ են տեղափոխել, որից հետո դիրքից վերադառնալիս նրանց հետ կապը կորել է։ Ձեռնարկված որոնողական աշխատանքների արդյունքում ավոտմեքենան գտնվել է մարտական դիրք տանող ճանապարհին՝ ՀՀ ԶՈՒ դիրքերի թիկունքում գտնվող հատվածում՝ շարժիչը գործարկված վիճակում, մեքենայի մեջ հայտնաբերվել է մեկ միավոր ԱԿ-74 տեսակի ինքնաձիգ, սակայն նշված երկու զինծառայողները չեն գտնվել:
Նախնական տվյալներով՝ հակառակորդի զինված խումբը հատել է ՀՀ սահմանը և առևանգել զինծառայողներին:
