Կառավարությունն այսօրվա նիստում հավանություն տվեց Հայաստանի և Եվրասիական զարգացման բանկի միջև «Կայունացման և զարգացման եվրասիական հիմնադրամի միջոցներից «Քաջարանի թունելի շինարարություն» ծրագրի ֆինանսավորման համար ներդրումային վարկի տրամադրման մասին» համաձայնագրին:
ՀՀ-ի և Եվրասիական զարգացման բանկի (ԵԶԲ) միջև նախատեսվում է կնքել վարկային համաձայնագիր, որով Կայունացման և զարգացման եվրասիական հիմնադրամի միջոցներից կտրամադրվի 200 մլն ԱՄՆ դոլարի չափով ներդրումային վարկ «Քաջարանի թունելի շինարարություն» ծրագրի ֆինանսավորման համար։
Ծրագրի մանրամասն նախագծով նախատեսվում է իրականացնել Քաջարանի թունելի (երկարությունը՝ շուրջ 7.0 կմ) կառուցման և գոյություն ունեցող Մ2 Երևան-Երասխ-Գորիս-Մեղրի-Իրանի սահման շուրջ 4 կմ (Քաջարանի թունելի մուտք- Սիսիան-Քաջարան նախատեսվող նոր ճանապարհահատվածի խաչմերուկ) երկարությամբ հատվածի վերակառուցման աշխատանքները:
Ըստ ՏԿԵ նախարար Գնել Սանոսյանի՝ թունելն ապահովված կլինի լուսավորության, օդափոխության, հակահրդեհային ժամանակակից համակարգերով: «Կլինի ասֆալտբետոնե ծածկով թունելի երթևեկելի մասը, 2 գոտի 9 մետր լայնությամբ, ինչպես նաև առաստաղին տեղադրված կլինի խողովակ, որը կապահովի օդափոխության համակարգի աշխատանքը:
Ճանապարհի սալահատակի տակ կառուցվելու է անվտանգության թունել: Գործող թունելից դեպի անվտանգության թունել կլինեն 14 վթարային ելքեր: Դրանք կլինեն 400 մետրը մեկ: Այս թունելի կառուցման արդյունքում ճանապարհը կկրճատվի շուրջ 14 կմ-ով և 50 կմ/ժ փոխարեն կանցնենք 80 կմ/ժ միջին արագությամբ: Տևողությունը կկրճարվի մոտ 40 րոպեով: Մեղրու լեռնանցքը այլևս շահագործելու կարիք չի լինի, և ձմռան պայմանները հաղթահարելու կարիք չի լինի»,-ասաց նախարարը:
Ծրագրի կարիքների համար նախատեսվում է օտարել շուրջ 160 հողամաս:
Նախատեսված շինարարական աշխատանքների իրականացման հաշվարկված ժամկետը կազմելու է շուրջ 6 տարի:
Նախատեսված շինարարական աշխատանքների նախահաշվային արժեքը կազմում է 144,6 մլրդ դրամ (շուրջ 369 մլն դոլար)։
