Այս դատարանի շենքում որևէ բան չի որոշվում. բոլոր քաղբանտարկյալների, այդ թվում և Արմեն Աշոտյանի վերաբերյալ բոլոր որոշումները վաղուց արդեն թելադրվում են Նիկոլ Փաշինյանի կողմից, ՀՀԿ փոխնախագահ Արմեն Աշոտյանի դատավարությունից առաջ՝ լրագրողների հետ զրույցում, ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։
«Եվ բացարձակ կապ չունի, որ Եվրոպան է Արմեն Աշոտյանիւն ճանաչում քաղբանտարկյալ, անհատ քաղաքական գործիչներն են ճանաչում քաղբանտարկյալ. դա իրենց չի հետաքրքրում։
Ակնկալել, որ Նիկոլ Փաշինյանին պետք է, որպեսզի Արմեն Աշոտյանը Եվրոպայում հնչեցնի իրականում պրոհայկական, պրոարցախյան օրակարգեր, տեղին չէ։
Բնական է, որ Փշինյանը ամեն ինչ պետք է անի, որ Արմեն Աշոտյանը զրկված լինի այդ հնարավորությունից։ Դավաճանության տեսանկյունից այսօր ամեն ինչ օրինաչափ է։ Որևէ ակնկալիք ես չունեմ, միակ հնարավորությունը, որ Արմեն Աշոտյանն ազատության մեջ կհայտնվի, իշխանափոխությունն է. դա իմ համեստ կարծիքն է»,- նշեց Հայկ Մամիջանյանը։
ԱԺ պատգամավորը միաժամանակ շեշտեց՝ գոնե իր համար ակնհայտ է, որ փողոցի ճնշման ներքո պետք է իրականացվի իմպիչմենտի գործընթաց։
«Ես, ճիշտն ասած, այլ օրակարգ և տրամաբանություն չեմ հասկանում։ Մենք պարտավոր ենք անելու ամեն ինչ՝ ապահովելու լայն հասարակության կոնսոլիդացիա ։ Այստեղ արդեն խնդիր չէ՝ սիրո՞ւմ ես Հայկին, Իշխանին, Գեղամին կամ Շարմազանովին, թե չես սիրում։ Այստեղ մի պարզ խնդիր կա. ուզո՞ւմ ես պետություն ունենալ, թե չես ուզում։ Եթե ուզում ես, ապա միակ տարբերակը Փաշինյանին հեռացնելն է, որովհետր բոլոր ցուցիչները ցույց են տալիս, որ վերջը մոտ է, պարզապես մենք պետք է պատասխանենք՝ Փաշինյանի՞ վերջն է մոտ, թե Հայաստանի Հանրապետության»,- ամփոփեց Մամիջանյանը։
