Նույնիսկ ամենաճկուն միտք ունեցող քաղաքական գործիչների կարողություններից է վեր միանձնյա որոշումներ կայացնել. համաձայն չեմ, որ որոշումները կայացնում եմ միանձնյա, բայց մյուս կողմից էլ համաձայն եմ, որ կայացնում եմ միանձնյա։ Լրատվամիջոցների ներկայացուցիչների հետ այսօր կայացած հանդիպման ժամանակ այս մասին ասաց ՀՀ վարչապետ Նիկոլ Փաշինյանը՝ պատասխանելով Azg.am-ի հարցին՝ չի՞ կարծում, որ Հայաստանի և Արցախի առջև ծառացած մարտահրավերների շուրջ որոշումներ պետք է կայացվեն ոչ թե միայնակ, այլ համահայկական ռեսուրսների մեկտեղմամբ։
«Այս հակասությասն բացատրությունը հետևյալն է. այո՛, խորհրդակցությունները՝ խորհրդակցություններ, քննարկումները՝ քննարկումներ, բայց ի վերջո պատասխանատվությունը, լիազորությունը քոնն է, և եթե ի վիճակի չես միանձնյա որոշում կայացնել, ուրեմն ի վիճակի չես լինել այդ տեղում»,- ասաց Նիկոլ Փաշինյանը՝ հավաստիացնելով, որ գործնականում չկա իր կողմից նախաձեռնված մի հարց, որը տասնյակ քննարկումներ չի անցնում։
Azg.am-ի թղթակցի դիտարկմանը՝ որպես որոշումներ կայացնող մարմիններ չվկայակոչել ԱԺ մեծամասնությանը կամ կառավարությանը, որոնք ընդամենը կյանքի են կոչում իր՝ ՀՀ վարչապետի կողմից արդեն իսկ կայացված որոշումները, Փաշինյանը նկատեց.
«Բա ո՞ւմ վկայակոչեմ։ Ընդդիմությա՞նը. ընդդիմաությանը ես պարբերաբար առաջարկել եմ, ասել եմ՝ եթե ուզում եք տեղեկություններ ստանալ, եկեք, մասնակցեք քննարկումներին։ Կառավարության զեկույցի քննարկման ողջ ընթացքում ես մաքսիմալ, մի քանի օր նստել եմ ԱԺ-ում, լսել եմ բոլոր ելույթները, հետո ինտերնետով նայել եմ բաց թողածս ելույթները։ Դա էլ է չէ՞ քննարկման ձև։ Նույնիսկ ամենասուր բանավեճի մեջ, երբ քո փաստարկներ ասում ես, բանավեճն ավարտվում է։ Թողնում-գնում ես, բայց այդ խոսակցությունը քեզ հետ է մնում, դու չես կարող այդ խոսակցությունը քեզնից դուրս հանել. այդ բանավեճը արդեն քո մեջ է շարունակվում»,- ասաց Նիկոլ Փաշինյանը։
Նա, որպես իր դիտարկման հավաստիացում, հիշեցրեց, որ 2018 թվականին, օրինակ, դիմել է Հանրային խորհրդին՝ խնդրելով խորհրդատվական աջակցություն ցուցաբերել ԼՂ հիմնախնդրի հարցում։
«Խորհրդակցել ենք։ Հանրության հետ էլ ենք խորհրդակցում. բա ասուլիսը ինչի՞ համար եմ հրավիրել։ Լսում եմ՝ լրագրողներն ինչ են ասում, արձագանքում եմ։ Էս էլ է չէ՞ խորհրդակցելու ձև։
Խորհրդակցելու տարբեր ֆորմատներ էլ կան, որոնց մասին դուք չգիտեք։ Շատ դեպքերում այդ ֆորմատները չեն էլ լուսաբանվում, որպեսզի տպավորություն չստեղծվի, որ մարդկանց հրավիրում ենք ՝ մեր պատասխանատվությունը կիսելու կամ նրանց վրա գցելու։
Մենք 2021 թվականի ընտրություններից հետո արտախորհրդարանական ուժերի ֆորմատ ձևավորեցինք, և խորհրդարանում չհայտնված ուժերի մեծամասնությանը հրավիրեցինք՝ նստել,-խոսելու, խելք խելքի տալու։ Մի քանի ուժ ընդունեցին հրավերը, մյուսները՝ ոչ։
Խորհրդակցելու ձև է նաև գնալ, մարդկանց հետ հանդիպելը, համայնքներում բնակիչների հետ խոսելը, կիսվելը։ Ես չեմ հիշում դեպք, երբ ինչ-որ ուժ կամ մարդկանց խումբ ասի, որ բան ունի ասելու, և մենք ասենք՝ չէ»,- ամփոփեց Նիկոլ Փաշինյանը։
