Քաղաքը՝ իշխանափոխության ճանապարհին
Հանրապետության երկրորդ քաղաքում մի քանի օր շրջանառված խոսակցություններն իրականություն դարձան: Հոկտեմբերի 28-ին պաշտոնապես հայտարարվեց, որ Գյումրին ընդգրկող 31-րդ ընտրատարածքային ընտրական հանձնաժողովը նույն օրն ստացել է համայնքային ավագանու 14 անդամի, այդ թվում՝ համայնքի ղեկավար Վարդգես Սամսոնյանի, ավելացնենք՝ նաեւ նրա առաջին տեղակալի պարտականությունների վաղաժամ դադարեցման արձանագրություններ: Նրանք քաղաքը կառավարող «Բալասանյան դաշինք» խմբակցության բոլոր անդամներն են:
Իսկ ամեն ինչ սկիզբ էր առել դրանից ավելի քան երկու շաբաթ առաջ, Բալասանյանների ընտանիքին պատկանող հայտնի «Սեւ բերդ» ամրոցի շրջակա հողամասի սեփականաշնորհման առնչությամբ սկսված քրեական վարույթի շրջանակներում նախկին քաղաքապետ Սամվել Բալասանյանի կրտսեր որդու, ապա գործող եւ նախկին երկու փոխքաղաքապետների ձերբակալություններից, որոնց հաջորդել է նաեւ իր՝ ԱՄՆ-ում բուժման նապատակով գտնվող Բալասանյանի նկատմամբ հետախուզում հայտարարելը:
Առայժմ քաղաքապետարանը շարունակում է աշխատել առանց քաղաքապետի ու նրա տեղակալների (տնային կալանքի ենթարկված մյուս տեղակալի լիազորությունները դատարանի որոշմամբ կասեցված են), հրաժարական են ներկայացրել նաեւ համայնքի ղեկավարի խորհրդականները, օգնականները, առնվազն երկու բաժինների վարիչներ: Նրանց կողմից որեւէ պաշտոնական հայտարարություն առայժմ չի հնչել:
Հատկապես մամուլում շրջանառվող տեսակետ է, թե 2021 թ. տեղական ընտրություններում այստեղ չստանալով քաղաքական մեծամասնություն, հանրապետությունում իշխող «Քաղաքացիական պայմանագիր» կուսակցության ղեկավարությունը մտադրվել է քրեական գործընթաց ձեռնարկելու միջոցով տիրանալ քաղաքի իշխանության ղեկին: Մանավանդ՝ 2026թ. համապետական ընտրություններից առաջ, որի քարոզարշավը կարծես թե անուղղակիորեն սկսվել է:
Գյումրու ավագանին ունի 33 մանդատ, որոնք 2021 թ. ՏԻՄ ընտրությունների արդյունքներով բաժանվել էին 5 քաղաքական ուժերի ներկայացուցիչների միջեւ: Քանի որ նրանցից ոչ մեկը չէր ստացել ընտրողների ձայների 50 տոկոսից ավելին, առավելագույն ձայներ ստացած «Բալասանյան դաշինքն» իր 14 մանդատով եւ ՔՊ-ն իր 11 մանդատով կառավարող կոալիցիա էին կազմել, սակայն վերջինս անցյալ տարվա դեկտեմբերին ինչ-ինչ դժգոհությունների պատճառով հաժարվել էր համագործակցությունից:
Նոյեմբերի 1-ին՝ ժամը 18-ին ընտրատարածքային ընտրական հանձնաժողովը քննարկելու է ազատված 14 մանդատների հարցը: «Բալասանյան դաշինքի» ավագանու անդամության ցուցակում մնացած 6 թեկնածուներից 5-ը եւս հրաժարվել են թեկնածությունից, իսկ 6-րդը բացակայում է՝ գտնվելով արտասահմանում: Ավագանու մնացած անդամները կարող են քվորում ապահովել եւ քաղաքապետ ընտրել: Եթե ոչ՝ ՔՊ-ն ժամանակավոր պաշտոնակատար կնշանակի եւ եկող տարի ընտրություններ կանցկացվեն: Այդ պաշտոնակատարը հավանաբար կլինի մի շրջան Շիրակի հերթական մարզպետ աշխատած, ապա այդ պաշտոնից ազատված՝ «Քաղաքացիական պայմանագիր» կուսակցության Շիրակի մարզային կառույցի պատասխանատու Կարեն Սարուխանյանը: Որին քաղաքում շատ չեն ճանաչում:
ԳԵՂԱՄ ՄԿՐՏՉՅԱՆ
