Պետք է գիտակցենք՝ Արցախը բոլոր հայերի հարցն է, ոչ թե միայն արցախցիներինը. սա միակ ճիշտ ճանապարհն է, որով պետք է գնանք. Գեղամ Նազարյան

ԱԺ «Հայաստան» խմբակցության պատգամավոր Գեղամ Նազարյանը լիովին կիսում է Արցախի Հանրապետությա նախկին պետնախարար Ռուբեն Վարդանյանի՝ նախօրեին ուղիղ եթերում հայտնած այն տեսակետը, որ ամբողջ հայկական աշխարհը պետք է ցուցաբերի նույն մոտեցումը՝ Արցախը բոլոր հայերի հարցն է, ոչ թե միայն արցախցիներինը։

«Ռուբեն Վարդանյանի այս դիտարկումը ոչ թե իրատեսական է, այլ միակ ճիշտ տարբերակն է, միակ ճիշտ ճանապարհը, որով մենք պետք է գնանք։ Իսկ թե այդ գիտակցումը քանի տոկոսն ունի, կապ չունի. դա երրորդական հարց է։ Անհնար է չկիսել այս միտքը, ասեմ ավելին՝ դա Ռուբեն Վարդանյանի գաղափարը չէ, դա բոլոր առողջ մտածող հայերի գաղափարն է։

Բոլոր նրանք, ովքեր այսօր հասկանում են, որ Արցախը մեր հայրենիքի մի մասն է, մեր բաղկացուցիչ մի մասը, մեր մարմնի մի կարևոր կտորը, իրենք այդ կոդով պետք է առաջնորդվեն։ Մեզնից յուրաքանչյուրը, ով այդ գիտակցումն ունի, իր ամեն օրվա խոսքով, գործողություններով, քայլերով պետք է նպաստի, որ թյուրիմացության և մոլորության մեջ գտնվող մեր մյուս հայրենակիցների աչքերն ու ականջները բացվեն»,- ասաց ընդդիմադիր պատգամավորը։

Գեղամ Նազարյանը շեշտեց՝ ինքը հավատում է, որ այդ օրը կգա, և հայ հասարակությունն աստիճանաբար դուրս կգա ծանր մղձավանջից։

«Հիմա, ցավոք սրտի, ոչ միայն գիտակցման պակաս կա, որ Արցախը մեր կարևոր մասնիկն է, այլ նաև Հայաստանում իշխում է չարը։ Բոլորը չարացած են իրար դեմ՝ վարորդներն իրար դեմ, մի հիմնարկի աշխատողները՝ միմյանց դեմ, էլ չասեմ ՔՊ ընտրողն ու «Հայաստան» դաշինք ընտրողը՝ իրար։

Այս չարից մենք պետք է ազատվենք. հենց ազատվեցինք, առկա խնդիրներն իրենց-իրենց կլուծվեն։ Բայց մինչև դրան հասնելը մարդիկ, ովքեր այսօր էլ գիտեն, որ դա այդպես է, պետք է այդ գաղափարով շարժվեն առաջ»,- ասաց պատգամավորը։

Հիշեցնենք, որ Ռուբեն Վարդանյանը երեկվա ֆեյսբուքյան ուղիղ եթերում նշել էր.

«Եթե մենք լինենք ուժեղ, համախմբված, եթե ցուցաբերենք այդ կամքը, այդ ոգին, այդ էներգիան, մենք կունենանք դաշնակիցներ, որ մեր կողքին կկանգնեն։ Այդ դաշնակիցները պետք է տեսնեն մեր կողմից 100 տոկոսով նվիրվածությունը մեր հայրենիքին, 100 տոկոսով պատրաստականությունը մեր հայրենիքը պաշտպանելու։ Եվ պետք է տեսնեն, որ մենք իրենց ինչ-որ հարցերում կարող ենք աջակցել, օգնել։ Կարևոր է, որ ամեն ինչ լինի երկկողմանի։

Եթե մենք կարողանանք այդ երկու հարցը համախմբել, ամեն ինչ կհաղթահարենք։ Արցախը որպես անկախ պետություն, մի մասն է հայկական աշխարհի։ Ամբողջ հայկական աշխարհը պետք է միանա և ցուցաբերի նույն մոտեցումը, որ Արցախը բոլոր հայերի հարցն է, ոչ թե միայն արցախցիների»։