Չեմ կարծում, թե Եվրամիության կողմից Հայաստան ուղարկվելիք դիտորդական նոր առաքելության հետ արժե մեծ հույսեր կապել, սակայն, ամեն դեպքում, առաքելության ներկայությունն ավելի դրական կլինի, քան եթե այն չլիներ, Azg.am-ի թղթակցի հետ զրույցում ասաց քաղաքագետ Արմեն Բաղդասարյանը։
«Այլ հարց է, որ դիտորդական առաքելությունը տարածվելու է միայն հայ-ադրբեջանական հարաբերությունների վրա, և իմ պատկերացմամբ՝ որևէ ազդեցություն չի ունենալու Արցախի շուրջ տեղի ունեցող իրադարձությունների վրա։
Կարծում եմ՝ ԵՄ դիտորդական առաքելությունը Հայաստանի նկատմամբ Ադրբեջանի նոր ագրեսիան կանխելու հարցում կարող է ինչ-որ դրական դերակատարում ունենալ։ Բայց, քանի որ դա հասկանալի պատճառներով էլ ավելի կսրի Հայաստանի և Ռուսաստանի միջև հարաբերությունները, առաքելության գործուղումը կարող է որոշակի բացասական հետևանքներ ունենալ Արցախի շուրջ տեղի ունեցող իրադարձությունների վրա»,- նկատեց քաղաքագետը։
Արմեն Բաղադասարյանի խոսքով՝ հայկական կողմը պետք է ողջունի ԵՄ քայլը՝ որպես ՀՀ անվտանգության՝թեկուզ փոքր երաշխիք, սակայն հաշվի առնի և փորձի կառավարել հայ-ռուսական հարաբերությունների հետ կապված ռիսկերը։
«Ռուսաստանը խանդով է վերաբերում այդպիսի հարաբերություններին և Արևմուտքի դերակատարման մեծացմանը մեր տարածաշրջանում և եթե ԵՄ դիտորդական նոր առաքելության գործուղումը դիտարկի որպես Արևմուտքի դերակատարումը մեծացնելու ուղղությամբ Հայաստանի կողմից կատարվող ուղիղ քայլ, բնականաբար իր հերթին կփորձի մեծացնել ճնշումները հայկական կողմի վրա առաջին եհրթին Արցախի ուղղությամբ»,- եզրափակեց մեր զրուցակիցը։
Հիշեցնենք, որ Եվրամիությունը մտադիր է մեկ ամսից դիտորդական նոր առաքելություն ուղարկել Հայաստան, այս անգամ ոչ թե երկու ամսով, այլ`առնվազն երկու տարով:
Ի տարբերություն անցած հոկտեմբերին ուղարկված քառասուն հոգանոց խմբի, որը տեղակայվել էր հայ-ադրբեջանական սահմանին, այս անգամ եվրոպացի դիտորդները պարեկություն կանեն Հայաստանի ողջ տարածքում: Նախորդ առաքելության նման, այս անգամ էլ նրանք անզեն կլինեն:
Եվրոպական խորհրդի Քաղաքական ու անվտանգության հանձնախմբի եզրակացության մեջ նշված է, որ դիտորդական առաքելության առաջնահերթությունն է նպաստել, որ Հայաստանի սահմանային գոտիներում ու հակամարտությունից տուժած շրջաններում միջադեպերը նվազեն, այդ տարածքներում ապրողների համար վտանգները կրճատվեն, և դրանով իսկ նպաստավոր պայմաններ ստեղծվեն Հայաստանի ու Ադրբեջանի միջև հարաբերությունների կարգավորման համար:
