Վրաստանի Սագարեջո քաղաքում (Կախեթի շրջան) 48-ամյա տղամարդը բնակարանի պատշգամբից կրակ է բացել բակում գտնվող մարդկանց, իսկ ավելի ուշ՝ դեպքի վայր կանչված ՆԳՆ աշխատակիցների ուղղությամբ. հաղորդում է «Արմենպրեսը»։
Դրա հետևանքով 5 մարդ զոհվել է, 5-ը՝ վիրավորվել: Այս մասին հաղորդում է Sputnik գործակալության վրացական ծառայությունը:
Վրաստանի Ներքին գործերի նախարար Վախթանգ Գոմելաուրին լրագրողներին հայտնել է, որ հատուկ գործողությունն ավարտվել է:
«Շատ ծանր դեպք է։ Ցավակցում ենք ընտանիքներին։ Հինգ հոգի զոհվել է։ Ցավոք, նրանցից մեկը մեր աշխատակիցն է: Հինգ հոգի վրավորվել է, որոնցից մեկի վիճակը ծանր է: Նրան վիրահատում են, և բժիշկներն առայժմ չեն կարող ասել, թե որքան ծանր է նրա վիճակը: Վնասվել է զարկերակը, և հնարավոր չէ ասել՝ նա ողջ կմնա, թե ոչ։ Տա Աստված, որ ողջ մնա», – ասել է Գոմելաուրին։
Նախարարի խոսքով՝ ոչ ոք չի կարող բացատրել, թե ինչու է տեղի ունեցել այս հանցագործությունը։
«Մի քաղաքացի տնից կրակ է բացել ավտոմատ հրազենից: Տանը եղել է նրա երեխան՝ չափահաս տղան: Նա սկսել է կրակել պատշգամբի մի կողմից, հետո՝ մյուս կողմից», – պատմել է Գոմելաուրին։
Դրանից հետո, ըստ նախարարի, զինված անձի երեխան դուրս է եկել բնակարանից։
«Այնուհետև ժամանել են ոստիկանության աշխատակիցները: Նա մյուս կողմից է կրակ բացել և վիրավորել մեր սպային, որը մահացել է հիվանդանոցի ճանապարհին», – ասել է Վրաստանի ՆԳ նախարարը։
Երբ դեպքի վայր է ժամանել հատուկ նշանակության ջոկատը, որը կասկածյալին կոչ է արել հանձնվել և բացել դուռը, հնչել է կրակոց։
«Երբ նրանք (խմբ.՝ հատուկ ջոկատի սպաները) ներս են մտել, նա պառկած էր մահճակալին, իսկ զենքը կողքին էր… Կային նաև մի քանի նռնակների պահանակի օղակներ: Հնարավոր էր ականապատում, սակրավորներ են կանչվել։ Այժմ նրանք ավարտել են (խմբ.՝ աշխատանքը)», – ասել է Գոմելաուրին։
Կասկածյալի տղան չի կարողացել նշել միջադեպի պատճառը։
«Նա ոչինչ չի կարող ասել: Նա ասաց, որ երբ դուրս է եկել, դիակներ են եղել, և նա փախել է», – հավելել է Գոմելաուրին։
Այս հանցագործության մեջ կասկածյալը Վրաստանի պաշտպանության ուժերում ծառայել է մինչև 2021 թ.-ը։
«Մեզ անմիջապես հաստատեցին, որ (խմբ.՝ կասկածյալը) աշխատում էր 2006 թ.-ից, իսկ 2021 թ.-ին հեռացել էր: Մեզ նաև հաստատեցին, որ նա առաքելությամբ եղել էր Աֆղանստանում», – ասել է Գոմելաուրին։
Հետաքննությունը շարունակվում է Վրաստանի քրեական օրենսգրքի երկու հոդվածով՝ դիտավորյալ սպանություն ծանրացուցիչ հանգամանքներում և ապօրինի կերպով հրազենի և ռազմամթերքի ձեռքբերում, պահում և կրում։
