Իրանի արտաքին գործերի նախարար Հոսեյն Ամիր Աբդոլլահիյանը Մոսկվա ժամանելուց հետո հայտնել է Ռուսաստանի արտգործնախարար Սերգեյ Լավրովի հետ նախատեսված հանդիպման մասին: Իրանցի դիվանագետի խոսքերը մեջբերել է IRNA գործակալությունը:
«Լավրովի հետ հանդիպման ժամանակ մենք կքննարկենք մեր դիրքորոշումները Կովկասում տեղի ունեցող իրադարձությունների վերաբերյալ, – ասել է նա, – մենք ակնկալում ենք, որ Ռուսաստանը կարձագանքի տարածաշրջանում սահմանների հնարավոր փոփոխությանը»:
Աբդոլլահիյանի այցը Մոսկվա տեղի է ունենում Ադրբեջանի և Իրանի՝ միմյանց հասցեին հնչող մի շարք քննադատական հայտարարությունների և Իրանի զինված ուժերի զորավարժությունների մեկնարկի ֆոնին:
Լավրովի հետ Աբդոլլահիյանի բանակցությունները նախատեսված են հոկտեմբերի 6-ին: Ակնկալվում է, որ կքննարկվեն միջուկային գործարքը, ինչպես նաև տարածաշրջանային օրակարգի այլ արդիական թեմաներ, ներառյալ իրավիճակը Կասպից ծովում, Անդրկովկասում, Պարսից ծոցում, Եմենում, Լիբանանում և Մերձավոր Արևելքում:
