Թուրքիայի նախագահ Ռեջեփ Թայիփ Էրդողանը սպառնացել է երկրից վտարել տասը երկրների դեսպաններին, այդ թվում՝ ԱՄՆ-ի, որոնք պահանջել են ազատ արձակել իրավապաշտպան Օսման Կավալային:
Ավելի վաղ Կանադայի, Ֆրանսիայի, Ֆինլանդիայի, Դանիայի, Գերմանիայի, Նիդերլանդների, Նոր Զելանդիայի, Նորվեգիայի, Շվեդիայի և ԱՄՆ-ի դիվանագիտական գերատեսչությունները կոչ էին արել ազատել Կավալային:
«Ինչո՞ւ են այս 10 դեսպանները նման հայտարարություններ անում։ Ես մեր ԱԳՆ-ին ասացի, որ մենք մեր երկրում նրանց ընդունելու շքեղությունը չունենք։ Թուրքիային դաս տա՞լը ձեր գործն է, դուք ո՞վ եք, մի կողմ դրեք Կավալային։․․․ Մեր դատարանն անկախության լավագույն օրինակն է», – ինքնաթիռում լրագրողներին ասել է Էրդողանը՝ վերադառնալով աֆրիկյան երկրներ կատարած ուղևորությունից: Նրան մեջբերում է Haberturk հեռուստաալիքը:
Օսման Կավալան հայտնի թուրք իրավապաշտպան է, Anadolu Kültür AŞ մշակութային հիմնադրամի հիմնադիրը, որը, մասնավորապես, աջակցում է էթնիկ և կրոնական փոքրամասնությունների նախագծերին՝ հաճախ միջազգային շեշտադրմամբ։ Նա այդ թվում աջակցում է թուրք և հայ բնակչության հաշտեցմանն ու քրդական հարցի խաղաղ լուծմանը:
