Կատարվողն անհասկանալի է՝ նպատակ է հեպանդվում Չարչյանի կյանքը վտանգելու ուղղությամբ. հասել ենք նրան, երբ կալանքն առողջական վիճակի հետ անհամատեղելի է, բայց նրան, անկախ դրանից, կրկին հետ են բերում ՔԿՀ, որտեղ ինֆարկտային վիճակի էր նա հասել: Այս մասին լրագրողների հետ զրույցում նշեց «Հայաստան» խմբակցության պատգամավոր Արամ Վարդեւանյանը՝ անդրադառնալով խմբակցության պատգամավոր, կալանքի տակ գտնվող Արմեն Չարչյանին բուժկենտրոնից «Վարդաշեն» քրեակատարողական հիմնարկ տեղափոխելու որոշմանը:
«Եղել են նախկինում իրավիճակներ, երբ մահ է արձանագրվել նման դեպքերի հետեւանքով: Պետք է մարդասեր լինել գոնե, դեռ իրավունքի մասին չեմ խոսում, նպատակը ո՞րն է՝ մարդու առողջությունը քայքայե՞լը, հանուն ինչի՞: Չարչյանն ազատության մեջ է եղել, երբ քրեական հետապնդումը կար, ազատ է արձակվել, պատգամավոր է, եւ այդ դեպքում պետք է գան ԱԺ՝ համաձայնություն ստանալու: Հիմա ինչի՞ց են անհանգստանում, մեր հարցերի՞ց, որ կարող ենք տալ Գլխավոր դատախազին:
Վարդեւանյանի խոսքով՝ Արմեն Չարչյանի պաշտպան Էրիկ Ալեքսանյանը հնարավոր բոլոր քայլերը ձեռնարկել է, բայց դեռեւս ապարդյուն:
«Որքան գիտեմ՝ բժիշկները նրա առողջական վիճակը բավարար չեն գնահատել, բայց գտել են, որ կարող է ՔԿՀ-ում մնալ: Որեւէ դեսպանատնից մենք այս ամենի վերաբերյալ արձագանք չենք լսում, որ կա ընտրողական արդարադատություն, երեք պատգամավոր կալանքի տակ է, հիմա այդ դեսպանատները որեւէ ասելիք չունե՞ն, գուցե հայերեն լեզվին չե՞ն տիրապետում դեսպանություններում»,- նկատեց պատգամավորը:
Վարդեւանյանը հայտնեց, որ խմբակցության մի քանի պատգամավորներով այցելելու են պարոն Չարչյանին՝ հասկանալու համար, թե ինչ պայմաններ են ՔԿՀ-ում:
Հարցին՝ արդյո՞ք հնարավոր է իրավական մեխանիզմներով արդյունքի հասնել նման իրավիճակում, Վարդեւանյանը նկատեց.
«Շատ մեծ բեռ է իր վրա վերցնում Դատախազությունը՝ թե՛ իրավական եւ թե՛ մարդկային իմաստով: Ի՞նչ նպատակ են հետապնդում, երբ տեսնում են՝ ինչպես է մարդու առողջական վիճակն իրենց աչքի առաջ վատանում: Դատախազությունը իրավունքին եւ օրենքին պետք է ծառայի, ոչ թե մարդկանց առողջությունը քայքայի»,- նշեց Վարդեւանյանը:
News.am
