Այսօր՝ հունիսի 23-ին, Արցախի Հանրապետության սոցիալական զարգացման և միգրացիայի նախարարության կողմից մեկնարկել է բարեգործական կազմակերպությունների կողմից Արցախ ուղարկված մարդասիրական օգնության բաշխման հերթական փուլը:
«Արցախպրես»-ի թղթակցի հաղորդմամբ՝ օգնությունը տրամադրվում է մայրաքաղաքի թիվ 5, թիվ 6, թիվ 8, թիվ 9 և թիվ 11 դպրոցներում ստեղծված կենտրոններում:
«Այս պահին օգնությունը բաշխվում է 63 տարեկանը լրացած աշխատանքային կամ սոցիալական կենսաթոշակառու անձանց, ովքեր ունեն հաշմանդամության կարգ կամ միայնակ են: Բաշխումն իրականացնելու ենք նաև հաջորդ շաբաթվա ընթացքում՝ բոլոր կետերում, դրանից հետո բոլոր հինգ կետերը փակվելու են, գործելու է միայն մեկը, որի մասին նախապես հայտարարվելու է: Բոլոր այն քաղաքացիները, ովքեր իրենց հումանիտար օգնությունը չեն ստացել, բայց հանդիսանում են շահառու, ապա կստանան վերջնական ձևավորված միայն մեկ կետից: Բաշխումն այժմ կատարվում է միայն մայրաքաղաքում փաստացի բնակվողների համար։ Շրջաններում ապրողների համար այս փուլն իրականացվել է»,-մեզ հետ զրույցում ներկայացրել է ԱՀ սոցիալական զարգացման և միգրացիայի նախարարության սոցիալական զարգացման ծրագրերի բաժնի պետ Հայկ Սողոմոնյանը։
Նրա իրազեկմամբ՝ տրամադրվող մարդասիրական օգնությունը կշռում է մոտ 18 կիլոգրամ՝ 14 անուն ապրանքատեսակով:
«Յուրաքանչյուր քաղաքացու տալիս ենք երկու տոպրակ՝ կենցաղային իրերով և սննդամթերքով»,-հավելել է Հ. Սողոմոնյանը՝ ընդգծելով, որ մարդասիրական օգնությունն բաշխվում է ամենաօպտիմալ ձևով:
