Երևի նկատել եք, որ փողոցային բառապաշարով լեզվակռվի ասպարեզում Նիկոլ Փաշինյանն իրեն զգում է ինչպես ձուկը՝ ջրում, բայց ամեն անգամ հիստերիայի մեջ է ընկնում, երբ իրեն հիշեցնում են Արցախը հանձնելու և 5 հազար զոհերի մասին։ Ու ամեն անգամ զայրույթից կակազելով պահանջում է հիմնավորել այդ թիվը։ Եվ զարմանալիորեն՝ մնում է անպատասխան։
Իսկ հիմա ներկայացնենք պաշտոնական թվերը։
Նիկոլ Փաշինյանի կառավարման ընթացքում տեղի է ունեցել հայ-ադրբեջանական 3 պատերազմ՝ 44-օրյան, 2022-ի Ջերմուկի ուղղությամբ ներխուժումը և 2023-ի սեպտեմբերի 19-20-ը՝ Արցախի օկուպացիան։ Եղել են նաև ավելի փոքրամասշտաբ բախումներ՝ 2021-ի մայիսյան ներխուժումը, Իշխանասարի ու Ներքին Հանդի բախումները, Արցախում՝ Փառուխ-Քարագլուխը, և այլն։
44-օրյա պատերազմում ունեցել ենք 3981 զոհ և 191 անհայտ կորած։
Այս թվերը պաշտոնապես հրապարակել է ՀՀ Քննչական կոմիտեն՝ ի պատասխան «Ազատություն» ռադիոկայանի հարցման։ Համաձայնվեք, որ եթե պատերազմի ավարտից 5 տարի անց 191 հոգի անհայտ կորած է համարվում՝ նրանց ողջ գտնելու հավանականությունը չնչին է։
2022-ին Ջերմուկի ուղղությամբ ռազմական գործողությունների ընթացքում ունեցել ենք 220 զոհ,
2023-ի «մեկօրյա պատերազմում»՝ 223 զոհ։
Այս տվյալներն անգամ 9-րդ դասարանի «Հայաստանի պատմություն» դասագրքում են ներառված։
Բացի այդ, Իշխանասարի ուղղությամբ ունեցել ենք 6 զոհ, Ներքին Հանդի ուղղությամբ՝ 4 զոհ (սրանք ՀՀ ՊՆ հրապարակած պաշտոնական թվերն են)։
Ընդհանուր թիվը դարձավ 4625։ Այս թվին պետք է ավելացնել նաև բենզինի պահեստի պայթյունի հետևանքով 219 զոհերին և 22 անհայտ կորածներին,
ինչպես նաև մոտ մեկ շաբաթ տևած բռնագաղթի ճանապարհին արձանագրված 82 մահերը։
Ինչու՝ որովհետև այդ զոհերը չէին լինի, եթե չլիներ պատերազմն ու պարտությունը։
Այսպիսով՝ զոհերի ընդհանուր թիվը կազմում է 4948։
Ուշադրություն դարձրեք՝ այս թվում ընդհանրապես ներառված չեն 2021-ի մայիսյան ներխուժման տվյալները, Քարագլուխ գյուղի մարտերը, առանձին կրակոցների արդյունքում մեր ունեցած զոհերը, Արցախի 9-ամսյա շրջափակման ընթացքում թերսնման կամ դեղորայքի բացակայության պատճառով արձանագրված մահերը, և այլն։ Եթե այդ թվերը նույնպես ավելացնենք՝ հաստատ 5000-ը կգերազանցի։
Բայց նույնիսկ դրանք չհաշված՝ ունեցել ենք 4948 զոհ, ուստի արձանագրում ենք 4948-ը, և հատուկ շեշտում ենք՝ ըստ Նիկոլ Փաշինյանի կառավարության տարբեր գերատեսչությունների հրապարակած պաշտոնական տվյալների։
Նիկոլ Փաշինյանը, իհարկե, կարող է ասել, որ այդ զոհերի մի մասի համար ինքն ուղղակի պատասխանատվություն չի կրում, բայց այդպես չի ասում։ Չի ասում՝ «գիտե՞ք ինչ, սիրելի ժողովուրդ, մենք իսկապես 5 հազար զոհ ենք ունեցել, բայց նրանց մի մասի զոհվելու մեղավորը ես չեմ»։
Փոխարենը՝ մարդկանց աչքերի մեջ ուղիղ նայելով ասում է «մենք այդքան զոհ չենք ունեցել», ու դեռ մի բան էլ հոխորտում է բոլոր նրանց վրա, ովքեր բարձրաձայնում են այդ թիվը։
Այ սա՛ է ցինիզմի գագաթնակետը։
Աղբյուր՝ https://www.4rd.am
