ԱՄՆ եզրակացության է հանգել, որ Իրանը պատասխանատու է Արաբական ծովում ճապոնական տանկերի վրա հարձակման համար: Այս մասին ասված է ԱՄՆ պետքարտուղար Էնթոնի Բլինկենի հայտարարության մեջ:
«Առկա տեղեկատվությունը ուսումնասիրելուց հետո մենք վստահ ենք, որ Իրանն է իրականացրել այդ հարձակումը, որի արդյունքում երկու անմեղ մարդ է զոհվել», ասել է ամերիկյան դիվանագիտության ղեկավարը: Վաշինգտոնը նշել է, որ հարձակումն իրականացվել է «պայթուցիկով անօդաչու թռչող սարքերի» կիրառմամբ:
«Այս հարձակման համար արդարացում չկա։ Մենք աշխատում ենք մեր գործընկերների հետ՝ ուսումնասիրելու մեր հաջորդ քայլերը և համապատասխան արձագանքի հետ կապված խորհրդակցում ենք տարածաշրջանի ու դրա սահմաններից դուրս կառավարությունների հետ», ավելացրել է նա:
Ավելի վաղ Մեծ Բրիտանիայի արտաքին գործերի նախարարությունը նույնպես հայտարարել էր, որ Իրանը պատասխանատու է Mercer Street տանկերի վրա հարձակման համար, որի արդյունքում զոհվել են անձնակազմի երկու անդամներ, այդ թվում`Մեծ Բրիտանիայի քաղաքացի:
