ԱՄՆ նախագահ Ջո Բայդենը հայտարարել է, որ չորեքշաբթի օրը Սպիտակ տանը հանդիպել է բելառուսական ընդդիմության առաջնորդ Սվետլանա Տիխանովսկայայի հետ:
«Ինձ համար պատիվ էր այսօր առավոտյան Սպիտակ տանը հանդիպել Տիխանովսկայայի հետ: ԱՄՆ-ն աջակցում է Բելառուսի ժողովրդին ժողովրդավարության և մարդու համընդհանուր իրավունքների հարցում», գրել է նա Twitter-ի իր էջում:
Հուլիսի 18-ից Տիխանովսկայան գտնվում է ԱՄՆ-ում: Անցյալ շաբաթ Վաշինգտոնում նա հանդիպել է ԱՄՆ պետքարտուղարի քաղաքական հարցերով տեղակալ Վիկտորիա Նուլանդի և Պետդեպարտամենտի խորհրդական Դերեք Շոլեի հետ, որի ընթացքում ներկա է եղել նաև ԱՄՆ պետքարտուղար Էնթոնի Բլինկենը:
Երեքշաբթի օրը Տիխանովսկայայի Վաշինգտոն այցի մանրամասներին ծանոթ աղբյուրը ՏԱՍՍ-ին հայտնեց, որ ԱՄՆ-ը շարունակում է աշխատել Բելառուսի դեմ նոր պատժամիջոցների մշակման ուղղությամբ, որոնք պետք է հայտարարվեն առաջիկա մի քանի շաբաթների ընթացքում:
