Միացյալ Նահանգները կկարողանա հակազդել Աֆղանստանում գործող ահաբեկչական խմբավորումներին առանց այդ երկրում ամերիկյան զորքերի ներկայության: Այդ հարցում վստահություն է հայտնել ԱՄՆ նախագահի՝ ազգային անվտանգության հարցերով օգնական Ջեյք Սալիվանը CBS–ին տված հարցազրույցում:
Նրա կարծիքով՝ ԱՄՆ-ն «ապացուցել է, որ կարող է ճնշել ահաբեկչական սպառնալիքները»՝ առանց երկրում իր ուժերի «լայնածավալ ներկայության»: «Մենք դա արել ենք այնպիսի երկրներում, ինչպիսիք են Լիբիան, Սոմալին, Եմենը: Եվ ապագայում դա մեզ կհաջողվի անել Աֆղանստանում», – ասել է ԱՄՆ նախագահի օգնականը:
Հարցին, արդյոք ԱՄՆ-ն մտածում է Աֆղանստան նոր ուժեր ուղարկելու մասին, Սալիվանը պատասխանել է. «Նախագահը մտադիր չէ նոր պատերազմ սկսել Աֆղանստանում: Նա մտադիր է ավարտել այս պատերազմը, որը շարունակվում է արդեն 20 տարի»:
Սալիվանը նաև ասել է, որ ԱՄՆ-ը կշարունակի նոր օդային հարվածներ հասցնել «Իսլամական պետություն» ահաբեկչական կազմակերպության մասնաճյուղ «Իսլամական պետություն Խորասանում»-ի գրոհայինների դեմ:
