ՀՀ վաստակավոր արտիստ, Երևանի Կոմիտասի անվան պետական կոնսերվատորիայի պրոֆեսոր Աննա Մայիլյանը խիստ բացասաբար է վերաբերում բուհի հնարավոր օպտիմալացմանը և ակադեմիական քաղաք տեղափոխելուն։
«Դա մեր մշակույթի վերջն է։ Եթե ստեղծվի արվեստի մեկ ընդհանուր բուհ, պատկերացնո՞ւմ եք՝ ինչ կլինի։ Նման բան ոչ մի տեղ չկա։ Ինչպե՞ս եք պատկերացնում, որ երաժշտական մեկ ֆակուլտետը կարողանա «արտադրել» երաժիշտներ։ Չի կարող։ Ինչպե՞ս է երաժշտական ընդամենը մեկ ֆակուլտետը նվագախումբ «լցնելու», ինչպե՞ս են երաժիշտներ ձևավորվելու. չէ՞ որ նվագախմբում մեկ-երկու ջութակահար չի լինում։
Կրկնում եմ՝ ինչպե՞ս են պատկերացնում մեկ երաժշտական ֆակուլտետ։ Նման բան չի կարող լինել. դա կլինի երաժշտական դպրոց։ Կոնսերվատորիայից հետո էլ նաև երաժշտական դպրոցները կմիացնեն, կլինի մեկ երաժշտական դպրոց, վերջ։
Ես աշխարհում չգիտեմ մի երկիր, որտեղ կոնսերվատորիաները կփակեն։ Հակառակը՝ այլ երկրներում բազմաթիվ կոնսերվատորիաներ կան, ընդ որում տարբեր տեսակի՝ ինչպես ուսումնարանների նման, այնպես էլ համալսարանների։ Նաև կան համալսարաններ, ինչպես օրինակ Սորբոնի համալսարանը, որն ունի երաժշտական բաժին։ Ֆրանսիայի բազմաթիվ քաղաքներում ևս գործում են կոնսերվատորիաներ։
Իսկ մեզ մոտ Կոնսերվատորիայի Գյումրիի մասնաճյուղն էլ են ուզում փակել, թողնել Երևանում ընդամենը մեկ ֆակուլտետ։ Պատկերացնո՞ւմ եք՝ դա ինչ քաոս է»,- Azg.am-ի թղթակցի հետ զրույցում ասաց Աննա Մայիլյանը։
Երևանի Կոմիտասի անվան պետական կոնսերվատորիայի պրոֆեսորը շեշտեց՝ Հայաստանը թեև փոքր, սակայն մշակութային երկիր է և չունենալով նավթ, գազ կամ մեկ այլ բնական ռեսուրս՝ ունի հզոր մեկ այլ պոտենցիալ՝ հարուստ մշակույթ։
«Մեր երաժիշտները, որոնք կրթություն են ստանում Կոնսերվատորիայում, հետագայում զարդարում են աշխարհահռչակ բեմերը։ Կոնսերվատորայից բարձր որակի երաժիշտներ են դուրս գալիս»,- շեշտեց Աննա Մայիլյանը։
Մեր զրուցակիցը միաժամանակ ընդգծեց՝ վաղուց ժամանակն էր, որպեսզի բուհի ղեկավարությունը թեմայի շուրջ հայտարարությամբ հանդես գար՝ հայտնելով դասախոսական կազմի դիրքորոշումը։
«Ուսանողները մեղք են։ Նրանցից շատերը որոշում են այլևս չշարունակել ուսումը։ Սա քաոս է։ Այս ամենին զուգահեռ՝ խոսակցություններ կան, որ Կոնսերվատորիայի շենքն արդեն իսկ վաճառված է, և ինչքան էլ բողոքենք՝ միևնույն է՝ այն արդեն ուրիշին է պատկանում։ Բայց հիմա մենք ուղղակի պետք է պայքարենք, որ Կոնսերվատորիան լինի։
Ինչ վերաբերում է բուհի՝ ակադեմիական քաղաք տեղափոխելուն, ուզում եմ հարցնել՝ ինչպե՞ս են պատկերացնում, ինչպե՞ս ենք գնալու այնտեղ։ Կոնսերվատորիան երկու երգեհոն ունի, դրանք ինչպե՞ս պետք է տեղափոխվեն։ Մարդիկ, որոնք դասավանդում են ոչ միայն Կոնսերվատորիայում, այլև՝ հարակից եդրաժշտական դպրոցներում, իրենց աշխատանքային առօրյան ինչպե՞ս են կազմակերպելու։ Մինչև գնան, հասնեն Աշտարակ… Օպերայում երգող դասախոսը, որն առավոտյան պետք է դասավանդի Կոնսերվատորիայում, հետո ինչպե՞ս պետք է հասցնի հետ գալ և պատրաստվել երեկոյան իր ելույթին։ Ինչպե՞ս են մարդիկ հասցնելու։ Կոնսերվատորիան կառուցողները հենց այնպես քաղաքի կենտրոնում չեն կառուցել բուհի շենքը։
Ի վերջո, ինչքա՞ն կարելի է արվեստի գործիչներին նյարդայնացնել, հաճո՞ւյք են ստանում։ Կարծես հատուկ քաղաքականություն լինի, որ զզվես, թողնես-գնաս։ Սա կյանք չի, չի կարելի այսպես ապրել։
Բանակն ու մշակույթը մեր կարևոր ինստիտուտներն են, որոնք ոտնահարվում և ջարդվում են։ Ես չեմ զարմանա, որ կառուցվի ռաբիսի ինստիտուտ»,- ամփոփեց Աննա Մայիլյանը։
Հիշեցնենք, որ ArmLur.am-ին հայտնի են դարձել այն 5 ուղղությունների ամբողջական ցանկը, որի շրջանակներում իրականացվելու է բուհերի օպտիմալացման եւ կամ խոշորացման ծրագիրը: Հայաստանում կլինեն բուհական կրթության 5 ուղղություններ՝ հետևյալ բաշխումով:
«Արվեստների» ուղղության մեջ են մտնում
1 Երևանի թատրոնի և կինոյի պետական ինստիտուտը
2 Երևանի Կոմիտասի անվան պետական կոնսերվատորիան
3 Հայաստանի գեղարվեստի պետական ակադեմիան
4 ՀՀ ԳԱԱ Հնագիտության և ազգագրության ինստիտուտը
5 ՀՀ ԳԱԱ Արվեստի ինստիտուտը
6 Պատմամշակութային ժառանգության գիտահետազոտական կենտրոնը
