Պոպուլիստական իշխանությունների աքիլլեսյան գարշապարը հենց ընտրություններն են, այսինքն՝ ընտրությունները Նիկոլ Փաշինյանի համար ամենախոցելի միջավայրն են, որովհետև դրանք ընդդիմությանն ու մյուս ուժերին դրսևորվելու բացառիկ առիթ են տալիս։ Այսօր տեղի ունեցած մամուլի ասուլիսի ժամանակ այս մասին ասաց «Դեմոկրատական այլընտրանք» կուսակցության ղեկավար, քաղաքագետ Սուրեն Սուրենյանցը։
«ՏԻՄ վերջին ընտրություններում իշխանությունները գրեթե ամենուր պարտվել են, իսկ ՏԻՄ ընտրություններն անցկացվում են նույն մոդելով, ինչ խորհրդարանական ընտրությունները։ Երևանի ավագանու ընտրություններում արդեն երևաց, որ իշխանությունն ընտրությունների առումով շատ խոցելի է։ Եթե չլիներ քաղաքական անասնագողության ակտը, Երևանում այսօր ՔՊ-ն իշխանության չէր լինի։2026-ին շատ փոքր եմ համարում իշխանության վերարտադրության շանսը
Հետևաբար բացարձակապես հիմնազուրկ եմ համարում ընդդիմադիր ճամբարից հնչող այն գնահատականները, որ ընտրությունների միջոցով հնարավոր չէ իշխանությանը փոխել։ Միանգամայն հնարավոր է, և ես 2026-ին շատ փոքր եմ համարում իշխանության վերարտադրության շանսը։ Մյուս կողմից, եթե արդյունավետ ընդդիմադիր հարթակ չստեղծենք, իշխանությունը կարող է վերարտադրվել։ Դա կնշանակի, որ «արևմտյան Ադրբեջանի» կոնցեպտը հաղթում է, դա կնշանակի ՀՀ պետականության կոլապս»,պ ասաց Սուրեն Սուրենյանը։
Քաղաքագետը հիշեցրեց՝ Նիկոլ Փաշինյանը մեկն է, որը 2021 թվականի հուլիսին Պուտինի նկարի առաջ աղոթելով՝ վերարտադրեց սեփականբ իշխանությունը, իսկ արդեն 2021-ի դեկտեմբերին ԵՄ խորհրդի նախկին նախագահ Շառլ Միշելի գրկում էր։
«Հիմա տեսեք, թե աշնանը ինչ խայտառակ զարգացումներ են տեղի ունենալու ՔՊ նոր վարչություն ընտրելիս։ «Իզմ»-եր չունենալը Նիկոլ Փաշինյանին օգնեց սանձարձակ ու ցինիկ լինել, երբ վարկանիշը բարձր էր, բայց «իզմ»-եր չունենալը դառնալու է նրա ողբերգությունը, երբ Փաշինյանը զրկվի իշխանությունից։ Որովհետև հակակոռուպցիոն կոմիտեի ու Քննչական կոմիտեի մոտ իր թիմակիցները հերթեր են կազմելու, թե առաջինն ով ցուցմունք կտա նրա դեմ»,- ամփոփեց Սուրենյանցը։
