Օնիկ Ախվերդյանն ընտրվել է Փարաքար համայնքի ղեկավար։
Համայնքի ավագանին ղեկավար է ընտրել «Միասնություն» դաշինքը ներկայացնող Օնիկ Ախվերդյանին, ով միակ թեկնածուն է եղել։
«Վալոդյան իմ մտերիմ ընկերն է, ցավում եմ եղածի համար, կշարունակեմ նրա գործը։
Տիրապետում եմ համայնքի բոլոր խնդիրներին, պատրաստ եմ իրականացնել այն ծրագիրը, որոնք խոստացել ենք մեր թիմով Վալոդյա Գրիգորյանի գլխավորությամբ։
Բացի մեկ թիմ լինելուց, ես անձամբ Վալոդյա Գրիգորյանի մտերիմ ընկերն եմ եղել, ցավում եմ այս ամեն ինչի համար։ Շնորհակալ եմ Վալոդյա Գրիգորյանի ընտանիքից, ծնողներից, որ մեր հայ ազգին պարգևել են այսպիսի զավակ:»,- ասել է նա:
Ինչ վերաբերում է մտահոգությանը, որ ՔՊ–ն կարող է գնալ «մանդատագողության»՝ իր կողմը քաշելով ավագանու «Միասնություն» դաշինքի անդամներից 1-2–ին և այդպիսով վերցնելով իշխանությունը համայնքում, Օնիկ Ախվերդյանն ասաց. «Ինձ թվում է, այդպիսի բանի չեն գնա, ու մեր թիմակիցների վրա ես վստահ եմ։ Դժվար է այդպիսի բանի գնան»։
Նշենք, որ Փարաքար խոշորացված համայնքի ավագանին այսօր՝ հոկտեմբերի 7–ին, համայնքի ղեկավար ընտրեց «Միասնություն» դաշինքը ներկայացնող Օնիկ Ախվերդյանին։ Նա ստացավ 12 ձայն:
Օնիկ Ախվերդյանը 52 տարեկան է, ծնվել է Փարաքար համայնքի Բաղրամյան գյուղում, ունի միջնակարգ կրթություն, ծառայել է հայկական բանակում 1992-1994 թվականին, ամուսնացած է, ունի երեք զավակ, 2021 թվականից «Ապրելու երկիր» կուսակցության անդամ է։ Մոտ 30 տարուց ավել զբաղվում է անհատ ձեռնարկատիրությամբ Հայաստանում և արտերկրում։
Մինչև համայնքների խոշորացումը Բաղրամյան գյուղում նույնպես ավագանի է եղել, մասնակցել է մի շարք ծրագրերի իրագործմանը, 2021 թվականին և 2025 թվականին Փարաքար համայնքի ընտրություններում եղել է Վալոդյա Գրիգորյանի թիմում։
Ավագանու «Քաղաքացիական պայմանագիր» և «Ազգային առաջընթաց» խմբակցության անդամները չմասնակցեցին ավագանու նիստին։
