Առաջիկայում սպասվում են ՏԻՄ ընտրություններ և այսօրվա իշխանությունը համատարած կերպով մեր հավանական թեկնածուների նկատմամբ իրականացնում է բռնաճնշումներ՝ ըստ Yerkir.am-ի ասաց ՀՅԴ Հայաստանի ԳՄ ներկայացուցիչ, ԱԺ փոխնախագահ Իշխան Սաղաթելյանը լրագրողների հետ զրույցում։
«Շարունակվում են հետապնդումները համայնքների ղեկավարների նկատմամբ, շարունակվում են ճնշումները, որպեսզի գործող, հեղինակություն ունեցող համայնքապետերը հրաժարական տան, որպեսզի իրենց թեկնածուներին նշանակեն ժամանակավոր պաշտոնակատար, և այդ ուղղությամբ փորձեն տեղական ընտրություններում հասնել հաջողության։ Որովհետև ակնհայտ է, որ հեղինակություն ունեցող շատ մարդիկ խուսափում են ՔՊ-ի ցուցակով առաջադրվել, այդ մարդկանց տարբեր մեղադրանքներով մեկուսացնում են, որպեսզի ՏԻՄ ընտրություններում ևս կարողանան հաջողության հասնել։ Սա է այսօրվա իշխանությունը, և ինչ կատարվում է մեր երկրում, մենք դրա հետ չենք կարող համակերպվել»,-նշեց նա։
Իշխան Սաղաթելյանը հաստատեց, որ Գորիսում երկու կուսակցություն դաշինք են կազմել և «Առուշանյան» դաշինքով մասնակցելու են ՏԻՄ ընտրություններին, ՀՅԴ-ն պաշտպանելու է Առուշ Առուշանյանի թեկնածությունը։
Նա ասաց, որ տարբեր համայքններում ունեն տարբեր մոտեցումներ՝ տեղեր կան, որ հանդես կգան դաշինքով, տեղեր կան՝ առանձին․ բազմաթիվ համայնքներում Դաշնակցությունը հանդես է գալու առանձին իր համամասնական ցուցակով։
«Այսինքն, եթե մի տեղ կա, որ կուսակցություններից մեկն է մասնակցում, չի նշանակում, որ տարաձայնություններ կան, պարզապես, հաշվի առնելով տեղի կառույցների կարծիքները, եկել ենք այդ եզրակացության»,-վստահեցրեց Իշխան Սաղաթելյանը։
Նա փաստեց, որ ՏԻՄ-ի հետ կապված տեղի են ունենում ակնհայտ ապօրինություններ, որին իրենք առաջկայում կանդրադառնան։
Իշխան Սաղաթելյանը նաև տեղեկացրեց, որ իրենք մի շարք դեսպանատների, այդ թվում նաև միջազգային կազմակերպությունների նամակով՝ դաշինքի անունից տեղեկացրել են, թե ինչ է կատարվում Հայաստանում այս օրերին։
Մանրամասն՝ տեսանյութում․
