Պարտավոր ենք վերջին քայլն անել. գնում ենք  գործողություն իրականացնելու՝ պետք է հասնենք Փաշինյանի հրաժարականին. Արամ Սարգսյան

Մեր գլխավոր խնդիրն է փրկել մեր հայրենիքը, և մեր այսօրվա ներկայությունը Տիգրանաշենում հենց սրանով է իմաստավորված։ Ժողովրդին դիմելով՝ ասում ենք՝ ժողովուրդ ջան, հասկացե՛ք, Նիկոլ Փաշինյանը, սուտ ասելով, փորձում է համոզել, որ իբր խաղաղություն է լինելու. իրականում հակառակն է լինելու, Տիգրանաշենում լրագրողների հետ հանդիպման ժամանակ այս մասին ասաց «Միասին» շարժման համակարգող խորհրդի անդամ, ՀԴԿ նախագահ Արամ Սարգսյանը:

«Ժողովուրդն այլևս հասկացել է, որ գոյություն ունի մի մարդ, որը պետության ղեկավարման վերաբերյալ շատ հպանցիկ պատկերացումներ ունի, որից պետք է ազատվել։ Պետք է ուղղակի ասել՝ գնա, զբաղվիր քո «Հայկական ժամանակ թերթը խմբագրելով։ Դա նրա մոտ լավ էր ստացվում»,- նշեց քաղաքական գործիչը։

Անդրադառնալով «Միասին» շարժման՝ մարտի 27-ին կայանալիք հանրահավաքին՝ Արամ Սարգսյանը տեղեկացրեց՝ իրենք այդ օրը ընդդիմադիր երեք խմբակցություններին պահանջ են ներկայացնելու, որպեսզի վերջիններս սկսեն Նիկոլ Փաշինյանին անվստահություն հայտնելու գործընթացը։
«Մեր հանրահավաքը շատ կարճ կտևի, և մենք ժողովրդի հետ գնալու ենք ԱԺ։ Մենք գալու ենք՝ ներկայացնելու ժողովրդի պահանջը և ցասումը։ ՔՊ պատգամավորները պատասխանատվություն են կրում։ Եթե նրանք շարունակեն նույն քաղաքական գիծը տանել, պետությունը հատված առ հատված փորձեն հանձնել, կանգնելու են դատարանի առջև, որովհետև սա հանցագործութուն է պետության դեմ»,- ասաց Արամ Սարգսյանը։

Լրագրողի ճշգրտող հարցին՝ այսինքն՝ «Միասին» շարժումը Նիկոլ Փաշինյանի իմպիչմե՞նտ է առաջարկում, քաղաքական գործիչը հայտարարեց, որ գնալու են օրինականության ճանապարհով։
«Մենք 10 օր ժամանակ ենք տալու, ինչից հետո դիմելու ենք մեր ժողովրդին, ասելու ենք, որ պարտավոր ենք վերջին քայլն անել, այսինքն՝ կանգնել այնքան ժամանակ, մինչև կհասնենք մեր նպատակին։

Ժողովուրդը հասկանում է, որ իրականում վտանգը շատ մեծ է։ Ներուժ կա, որ դեռ չի օգտագործվել։ Հիմա բոլորին կոչ ենք անում՝ ամսի 27-ին եկեք, որովհետև մենք գնում ենք  գործողություն իրականացնելու։ Սա արդեն այն փուլն է, երբ հապաղել չենք կարող»,- նշեց Արամ Սարգսյանը։

Նա միաժամանակ շեշտեց՝ չգիտի որևէ պետության ղեկավարի, որը պատերազմով շանտաժ կանի սեփական ժողովրդին, և ժողովուրդը պետք է հասկանա, որ վախկոտ մարդու քաղաքական գիծը տանելով՝ ինքն իրեն կործանում է։

«Պետք է հասկանալ, որ ուրիշ ելք չկա. մենք պետք է հասնենք հրաժարականին, ուրիշ ելք ուղղակի չկա։ Եթե նա ասում է, որ այստեղ ադրբեջանցիներ են բնակվել, բա Նախիջևանում, Արցվախում ինչքա՞ն հայ է ապրել։ Ադրբեջանում 650 հազարից ավելի հայեր են ապրել, որոնք հարկադրված հեռացել են։ Դե բերեք Գարդմանը պահանջենք, Արցախը հետ պահանջենք։ Կիրովաբադի կեսը տվեք հենց հիմա, Նախիջևանը՝ առաջին հերթին»,- նշեց Արամ Սարգսյանը։