ԱՄՆ նախագահ Դոնալդ Թրամփը չորեքշաբթի սաստկացրել է Գրենլանդիայի նկատմամբ իր հավակնությունները՝ փոխնախագահ Ջեյմս Դեյվիդ Վենսի այցից առաջ հայտարարելով, որ ԱՄՆ-ը «միջազգային անվտանգության» նպատակներով պետք է վերահսկողության տակ վերցնի դանիական կղզին:
Հունվարին պաշտոնը ստանձնելուց ի վեր Թրամփը բազմիցս հայտարարել է, թե ցանկանում է, որ ինքնակառավարվող տարածքը լինի Վաշինգտոնի վերահսկողության տակ՝ հրաժարվելով բացառել ուժի կիրառումը դրան հասնելու համար։
«Մեզ Գրենլանդիան պետք է միջազգային անվտանգության համար: Մեզ այն պետք է: Մենք պետք է այն ստանանք»,-ասել է Թրամփը «The Vince Show»-ին տված հարցազրույցում: -Ես ատում եմ դա ասել, բայց մենք ստիպված ենք այն ստանալ»:
Ինչպես նշում է Ֆրանսպրես գործակալությունը, Գրենլանդիան, որը ձգտում է անկախանալ Դանիայից, ունի հանքանյութերի և նավթի հսկայական պաշարներ, թեև նավթի և ուրանի արդյունահանումն արգելված է:
«Եվ մեզ պետք է այդ հողը, քանի որ առանց դրա մենք չենք կարող պատշաճ կերպով պաշտպանել այս Երկրի մեծ մասը, ոչ միայն Միացյալ Նահանգները»:
Կղզին ռազմավարականորեն առումով տեղակայված է Հյուսիսային Ամերիկայի և Եվրոպայի միջև՝ Արկտիկայի նկատմամբ ԱՄՆ-ի, Չինաստանի և Ռուսաստանի աճող հետաքրքրության ժամանակաշրջանում, երբ կլիմայի փոփոխությունները բացել են ծովային ուղիները:
Հարցին՝ արդյոք նա կարծում է, թե գրենլանդացիները ձգտում են միանալ Միացյալ Նահանգներին, Թրամփը պատասխանել է, որ ինքը տեղյակ չէ:
