Երկար ժամանակ է մենք խոսում ենք ՀՀ սահմանից ներս գտնվող թշնամու մասին, բայց ազգովի չենք հասկանում` ինչ պետք է անել, որովհետեւ անելու մասով վտանգներով հղի իրավիճակ ունենք։ Այս մասին ԱԺ ամբիոնից հայտարարեց «Պատիվ ունեմ» խմբակցության պատգամավոր Թագուհի Թովմասյանը։
Վերջինս նշեց, որ այս հարցի վերաբերյալ գրավոր հարցում է ուղարկել Գլխավոր Դատախազությանը` խնդրելով պարզաբանել երեք հարց.
«Առաջինը` արդյոք ադրբեջանական զինուժի արարքներում Դատախազությունը տեսնում է ՔՕ-ին համապատասխան հոդվածներով նախատեսված հանցագործության դրսևորումներ և ինչ միջոցներ են ձեռնարկել։
ՀՀ ինքնիշխան տարածք ադրբեջանական զորամիավորումների ներթափանցման, 3.5կմ խորանալու, ինչպես նաեւ Գորիս-Կապան ճանապարհը փակելու դեպքերով կա՞ն հարուցված քրեական գործեր։
Երրորդ հարցը` եթե ՀՀ ինքնիշխան տարածք ադրբեջանական զորամիավորումների ներթափանցման, ճանապարհները փակելու դեպքերով կան հարուցված քրեական գործեր, ապա երբ են հարուցվել, ինչ փուլում են և կան արդյոք մեղադրյալներ»։
Թովմասյանը նշեց, որ Գլխավոր դատախազությունից այս հարցերի վերաբերյալ ստացել է պատասխան, որ մայիսի 13-ից սկսած հարուցվել են մի շարք քրեական գործեր բավականին ճոխ հոդվածներով։
«Պատասխանի մեջ նշված է, որ նշված գործերով նախաքննությունը շարունակվում է և որպես մեղադրյալներ ներգրավված անձիք չկան։ Այս նախադասության մեջ է ողջ խնդիրը։ Ինչու չկան ներգրավված մեղադրյալներ և ինչու ադրբեջանական ռազմաքաղաքական իշխանության համար չենք ստեղծում պրոբլեմ։ Ինչու ենք թողնում, որ ադրբեջանական ռազմաքաղաքական իշխանությունը օգտվի իր ազատ տեղաշարժվելու իրավունքից և որպես հանցագործ չեն վերաբերում նրանց։ Ինչու նրանց նկատմամբ չի հայտարարվել միջազգային հետախուզում»։
Թովմասյանը ընդգծեց, որ Գլխավոր Դատախազությունը ոչ թե պետք է Ադրբեջանի ֆուտբոլային մեկնաբանի նկատմամբ իրականացնի հետախուզություն, այլ Ադրբեջանի ռազմաքաղաքական ղեկավարության համար ստեղծի պրոբլեմ։
«Հայաստանի տարածքից ադրբեջանական զինուժի դուրս շպրտելու իրավական ճանապարհը գտնվում է Դատախազության ձեռքին։Ինչու ենք մենք վախենում Ալիևից և Ալիևի կլանից »,- ասաց Թագուհի Թովմասյանը։
Tert.am
