Անկախության հռչակագիրն իրականում ոչ թե անցյալին, այլ ապագային միտված փաստաթուղթ է՝ չնայած պատմական փաստաթուղթ է, այսօր լրագրողների հետ ճեպազրույցում հայտարարեց ՀՀ արդարադատության նախարար Սրբուհի Գալյանը։
«Սահմանադրությունը պետք է նայի դեպի ապագա և շեշտադրի պետության շարունակականությունը, ապագա սերունդներին խաղաղ, անվտանգ պետություն տալու առաքելությունը։ Այսինքն՝ այս հիմնական գաղափարներն է շեշտադրելու Սահմանադրությունը։
Մենք ամեն ինչ անելու ենք, որ յուրաքանչյուր դրույթ մանրամասն»,- ասաց Գալյանը։
Հարցին՝ ի՞նքն էլ Նիկոլ Փաշինյանի նման կարծում է, որ Անկախության հռչակագիրը կոնֆլիկտածին է, նախարարը պատասխանեց՝ ինքը բազմիցս ասել է, որ ոչ միայն Սահմանադրությունը, այլև որևէ իրավական ակտ չպետք է պարունակի ՀՀ անկախությունը, խաղաղությունը, ինքնիշխանությունն ու տարածքային ամբողջականությունը վտանգելու դրույթներ։
Հաջորդ ճշգրտող հարցին՝ Հայոց ցեղասպանության մասին դրույթը վտանգո՞ւմ է ՀՀ անկախությունն ու խաղաղությունը, Սրբուհի Գալյանը պատասխանեց՝ արդեն հայտնել է իր դիրքորոշումը։
Իսկ Հայաստանի Հանրապետությունը նույն տրամաբանությամբ կոնֆլիկտածին համարո՞ւմ է Ադրբեջանի սահմանադրությունը, հետաքրքրվեցին լրագրողները։
«Մենք մեր Սահմանադրությունը կոնֆլիկտածին չենք համարել։ Մեր իրավական համակարգը պետք է միտված լինի մեր պետության կայունացմանը և մեր քաղաքացիների շահերի սպասարկմանը։ Առջևում ազատ և անկախ ընտրություններ են, և քաղաքացիներն ազատ են որոշելու այդ մանդատը կրկին տրամադրել կամ չտրամադրել գործող իշխանությանը»,- ասաց Սրբուհի Գալյանը։
