Հայաստանի ընտրական օրենսգրքում նախատեսվող փոփոխությունները կարող են հայ քաղաքացիներին զրկել ընտրություններին մասնակցելու իրավունքից՝ Մոլդովայի օրինակով։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան. հաղորդում է ՏԱՍՍ-ը:
Դիվանագետը մեկնաբանել է Հայաստանի իշխանությունների կողմից նախատեսվող նոր փոփոխությունները, որոնց համաձայն քաղաքացիները կկարողանան մասնակցել քվեարկություններին և հանրաքվեներին միայն այն դեպքում, եթե նրանք իրականում բնակվել են հանրապետությունում ընտրությունների օրվանից վեց ամիս առաջ։
«Ինչպես ակնհայտ է, օրենքները նախատեսված են տվյալ երկրի քաղաքացիների իրավունքները պաշտպանելու համար, բայց այստեղ, կարծես, հակառակն է. հայկական անձնագրեր ունեցող մարդիկ զրկվում են իրենց որոշ հիմնարար իրավունքներից, մասնավորապես՝ ընտրություններին մասնակցելու իրավունքից», – ասել է նա։
«Հաշվի առնելով եվրոպացի մասնագետների ակտիվ աշխատանքը հանրապետությունում, անհնար է չհիշել Մոլդովայում 2025 թվականի ընտրարշավը, երբ [Մայա] Սանդուի ռեժիմը միտումնավոր ամեն ինչ արեց, որպեսզի Ռուսաստանում գտնվող հայրենակիցները չկարողանան իրականացնել իրենց ընտրական իրավունքը: Նույնը վերաբերում է նաև Հայաստանին. սփյուռքը կմնա մեկուսացված իր երկրի և նրա ժողովրդի հասարակական-քաղաքական կյանքից», – նշել է Ռուսաստանի դիվանագիտական ներկայացուցիչը:
Զախարովան նաև նշել է, թե ինչպես է օրինագիծը ներկայացվում հանրությանը լրատվամիջոցներում։ «Մենք տեսանք, որ մի շարք կառավարամետ լրատվամիջոցներ այն ներկայացրին որպես Կրեմլի առասպելական հիբրիդային հարձակումների դեմ պայքարի միջոց, որոնք, իբր, փորձում էին օգտագործել Ռուսաստանում հայկական սփյուռքի ռեսուրսները խորհրդարանական ընտրությունների համատեքստում։ Գիտեք, կարծում եմ, որ այս առասպելը պարզապես կոտրվում է Հայաստանի Ազգային անվտանգության ծառայության կողմից հրապարակայնորեն ներկայացված թվերով։ Նրանց տվյալներով՝ 2025 թվականի մայիս-հունիս ամիսներին հանրապետություն են մուտք գործել ավելի շատ քաղաքացիներ, քան այս տարվա նույն ժամանակահատվածում։ Ուրեմն, ո՞վ է, ի վերջո, անազնիվ», – եզրափակեց Ռուսաստանի արտաքին գործերի նախարարության պաշտոնական ներկայացուցիչը։
