Լրագրողների հետ այսօրվա ճեպազրույցում Էկոնոմիկայի նախարար Գևորգ Պապոյանը հիշեցրեց՝ կառավարության որոշմամբ Սաուդյան Արաբիայի, Բահրեյնի և Օմանի քաղաքացիների համար վիզային ռեժիմը հանվել է, հետևապես տուրիստական մեծ հոսքերի ակնկալիքներ կան։
«Ես կոչ կանեմ մեր գործարար համայնքին՝ պատրաստվել հոսքերին և, իհարկե, մեր գործարար համայնքի հետ համատեղ աշխատանքով, բարձր որակի սպասարկմամբ ի վերջո հասնենք նրան, որ Հայաստանի զբոսաշրջային գրավչությունն է՛լ ավելի մեծանա, և այս առումով ուզում եմ նշել, որ պետությունը բազմաթիվ ներդրումներ է իրականացնում:
Մենք ավարտեցինք մեկ ծրագիր Համաշխարհային բանկի հետ, որտեղ հսկայական ծավալով ներդրումներ եղան մեր զբոսաշրջային ենթակառուցվածքների մեջ, և մենք կկնքենք նոր վարկային համաձայնագիր ՀԲ-ի հետ, որով Հայաստանը իր զբոսաշրջային ենթակառուցվածքների զարգացման համար 100 մլն դոլար կներդնի:
Մասնավորապես, Գորիսի համար կներդնենք, Եղեգիս ագրոկլաստերը կստեղծենք Եղեգիս համայնքում, Արենի գինու կլաստերը կստեղծենք, Գյումրու վրա մեծ ներդրումներ կիրականացնենք, Դիլիջանը, որպես առողջարանային կլաստեր, Ջերմուկի վրա շատ մեծ ներդրումներ ենք պատրաստվում անել, Ապարան կլաստերի վրա, Դվին կլաստերի վրա, և այսպես շարունակ»,- ասաց նախարարը։
