«Քիչ առաջ ահազանգ ստացանք, որ ՊՆ նախկին շենքի բակում իրենց բողոքն արտահայտող քաղաքացիներին, որոնց նախօրեին երկար բանակցություններից հետո ոստիկանները թույլատրել էին վրաններ տեղադրել, հիմա պահանջում են վրանները հավաքել և հեռանալ տարածքից: Գործընկերոջս՝ Գառնիկ Դանիելյանի հետ արդեն դեպքի վայրում ենք»,-տեղեկացնում է «Հայաստան» խմբակցության պատգամավոր Ասպրամ Կերպեյանը։
Նա դեպքի վայրից տեսանյութ է հրապարակել՝ ներկայացնելով իրավիճակը։
Պաշտպանության նախարարության նախկին շենքում ժամանակավորապես ապաստանած մարդիկ հավաքավել են մեկ վրանի տակ, որը վառարանով է տաքացվում։ Վրանի տակ են թե՛ երեխաները, թե՛ կանայք, թե՛ տղամարդիկ, թե՛ ծերերը։
Երեխաներից ոմանք հիվանդ են, ջերմություն ունեն. բոլորը զրկված են կենցաղային նվազագույն պայմաններից։
Ասպրամ Կրպեյանը տեղեկացրեց, որ դպրոցահասակ երեխաներին վտարել են նաև դպրոցներից։
Չնայած հողի սեփականատերը դեմ չէ,որ երկրորդ վրանը տեղադրվի, բայց ոստիականներն արգելել են, թույլ չեն տալիս։
Հիշեցնենք, որ ՊՆ նախկին շենքը ՊԵԿ-ի հաշվեկշռում է, և այդ կառույցի պահանջով շենքում ժամանակավորապես ապաստանած բնակիչներին, որոնց մեջ կան պատերազմի մասնակիցներ, հաշմանդամներ, Արցախում տուն ու տեղ կորցրած ընտանիքներ, ոստիկանները վտարել են։
Հետաքրքիր է՝ բաց երկնքի տակ արդեն 3 օր ապրող մարդկանց վիճակը ՀՀ Մարդու իրավունքների պաշտպանի գրասենյակին չի՞ անհանգստացնում, ինչքան էլ որ երկիրը ՄԻՊ չունի, կամ ինչո՞ւ են լուռ երեխաների իրավունքների պաշտպան կազմակերպությունները. խախտվել է նաև երեխաների կրթվելու իրավունքը. նրանց դպրոցներից հանել են։
Մի քանի տասնյակ մարդիկ դեռ ինչքա՞ն են անօթևան մնալու, եթե գնալու տեղ չունեն։
