7 ամիս շարունակ անազատության մեջ գտնվող «Այլընտրանք» հասարակական կազմակերպության ղեկավար, «Հայաստան» դաշինքի ներկայացուցիչ Նարեկ Մանթաշյանը այլևս ազատույան մեջ է։
Սահմանված 20 մլն դրամ գրավը վճարելուց հետո Մանթաշյանը քիչ առաջ դուրս եկավ «Վարդաշեն» քրեակատարողական հիմնարկից։
Նշենք, որ Երեւանի ընդհանուր իրավասության դատարանի դատավոր Կարեն Ֆարխոյանը այսօր փոխեց Նարեկ Մանթաշյանի խափանման միջոց կալանավորումը և 20 մլն դրամ գրավի դիմաց Մանթաշյանին ազատ արձակելու որոշում կայացրեց:
Հիշեցնենք՝ Նարեկ Մանթաշյանին մեղադրանք է առաջադրվել ՀՀ ՔՕ 225-րդ հոդվածի 1 -ին եւ 2-րդ մասերով՝ այն է զանգվածային անկարգություններ կազմակերպելը եւ դրանց ժամանակ բռնություն գործադրելը ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը։ Լրատվամիջոցներում այն ստացել է «#դրոշի_գործ» անվանումը։
Մանթաշյանն իրեն առաջադրված մեղադրանքը չի ընդունում եւ այն որակում է որպես քաղաքական հետապնդում իր նկատմամբ։
