«Խաղաղության պայմանագիրն այն մասին է, որ ամեն ինչ պետք է հստակ լինի։ Հայկական կողմն աշխատում է այդ հստակության վրա, մենք կողմ ենք, որ ստեղծվի երաշխավորի ինստիտուտ. սա է հայկական կողմի դիրքորոշումը։
Այս մեխանիզմին կարող է անդրադարձ լինել միջազգային այլ պայմանագրում, որի շուրջ բանակցություններ են ընթանում։ Սա քննարկման առարկա է, որը պետք է շարունակել քննարկել հստակեցնելու համար։ Այս փաստաթուղթը վերջնական չէ, բանակցություններ են ընթանում, հասկանալի է, որ հանրությունը հստակ պատասխաններ է ակնկալում, բայց դա բանակցային գործընթաց է։
Այն տեքստի վրա, որը փոխանցել էր մեզ Ադրբեջանը, մենք աշխատել ենք և փոխանցել ենք, հետո Ադրբեջանն է աշխատել ու փոխանցել։ Հիմա հայկական կողմն է աշխատում և կարծում եմ, որ այդ տեքստը հնարավորինս շուտ պատրաստ կլինի, և մենք կփոխանցենք դեռ հայտնի չէ, թե ինչ ձեւով»,- լրագրողներին ասել է ՀՀ ԱԽ քարտուղար Արմեն Գրիգորյանը։
Նա նշել է՝ Հայաստանը կողմ է, որ Ստեփանակերտն ու Բաքուն բանակցեն։
Արցախի հարցը ներառվելո՞ւ է խաղաղության պայմանագրում, առհասարակ Հայաստանի համար Արցախը այդ պայմանագրում ինչ տեղ է զբաղեցնելու և արդյո՞ք որևէ տեղ զբաղեցնելու է։ Արմեն Գրիգորյանը հստակ պատասխան չի տվել՝ ասելով․ «Հայկական կողմի համար ավելի կարևոր է միջազգային տեսանելի մեխանիզմի ստեղծումը, որի շրջանակում Ստեփանակերտն ու Բաքուն կքննարկեն անվտանգության և իրավունքի հարցերը։ Թե դա որ ֆորմատով կկատարվի, առաջնային չէ։ Առաջնայինն է այն, որ ստեղծվի մեխանիզմ»։
