44-օրյա պատերազմում զոհվածների հարազատները պահանջում են պատասխանատվության ենթարկել իրենց սպանված զավակների դիերն և մասունքները դիահերձարանի նկուղի հատակին պահելու համար։
Ծնողների բողոքի հիման վրա Կոտայքի մարզի ընդհանուր իրավասության դատարանում՝ Աբովյանի դիահերձարանի նկուղում գետնին անփութորեն թափված պարկերով մեր հերոսների դիակների ու մասունքների սահմռկեցուցիչ տեսանյութի հետքերով այսօր առաջին դատական նիստն էր:
Զոհված զինծառայողների ծնողները պահանջում են պատասխանատվության ենթարկել Աբովյանի դիահերձարանի նկուղում իրենց որդիների դիերն և մասունքները անմադկային պայմաններում պահելու համար։
Նշված գործով իրականցվել է ոչ լրիվ, ոչ օբյեկտիվ, ոչ բազմակողմանի քննություն. համոզված է մեղադրող կողմը:
«Շուրջ 30 դիակ կամ մասունք, որոնց ակնհայտ մեծ մասը նույնականացված էր, պահվել են ոչ պատշաճ պայմաններում։ ԶԼՄ-ներով խնդրին անդրադառնալուց հետո են միայն դիերը և մասունքները տեղափոխվել Մարտունի քաղաք: Ինչից ենթադրվում է, որ դիերը նման պայմաններում պահելը ամենևին էլ պայմանացվորված չէր ֆորս մաժորային վիճակով: Հերոսների դիակները անարգվել են»,- ասաց փաստաբան Գարիկ Գալեյանը:
Դատարանը բողոքի քննությունը ավարտված համարեց, որոշումը օգոստոսի 3-ին կհրապարակի:
Դիակները գետնին, պոլիէթիլենային տոպրակների մեջ են եղել, քանի որ սառնարանները չեն աշխատել: Իսկ հատակը խոնավ է եղել, մարմինները որդերով պատված ու գարշահոտ էր տարածքում. փաստում են ականատեսները:
«Մենք չափել ենք, 16 է եղել ջերմաստիճանը: Սա մեր հերոս տղեքի դիակների նկատմամբ վատ վերաբերմունքի առաջին դեպքը չի եղել: Կապանի դիահերձարանի բաց շենքում տղերքի մարմինները ամառ օրով շարել են, նեխացրել: Հաջորդը, ծնողին կանչում են դիակի ճանաչման: Բացում են, ամբողջությամբ մարմինը որդերի մեջ: Բիշարյանին ասել եմ՝ 2-3 օրը մեկ մաքրեք մարմինները, որ ծնողը չգա այդ տեսարանին ականատես լինի: Էլ դիակի հանդեպ անագրանքը ո՞րն է, եթե ոչ սա»,- դատական նիստի ավարտից հետո դատախազի հետ զրույցում ասաց զոհված զինծառայողի հարազատ Արսեն Ղուկասյանը:
Շատ դժվար է քեզ լսելը, հարազատ. արձագանքեց դատախազ Պետրոս Պետրոսյանը:
«Բոլորիս համար ցավ է սա: Բարոյական տեսանկյունից ես, ցանկացած պաշտոնատար անձ էս պատմածիդ համար պատրաստ ենք պատասխանատվություն կրել, որ մեր երկիրը չի կարողացել ապահովել: Ես չեմ կարծում, որ որեւէ հայի նպատակը լիներ նման վերաբերմունքի արժանացնելը»,- նշեց դատախազ Պետրոսյանը:
Ժիրայրս երկու ամսվա ծառայող էր, պետք է զորացրվեր հուլիսի 13-ին, իսկ ես հիմա կանգնած եմ դատարանի առջև. նշեց զոհվածի մայրը:
«Ուրբաթ օրը բոլորին՝ քննչականին, Հերացու հիվանդանոցին տեղեկացնում եմ, որ գալու եմ երեխուս մասունքի հետևից, իսկ իրենք անփույթ ձևով են վարվում: Երկուշաբթի եկել եմ, 2-3 ժամ սպասել եմ, մինչև Մարտունուց երեխուս դիակը բերեն: Մեղավոր են բոլորը, պետք է պատասխան տան, ես երեխուս մասունքի առաջ եմ երդվել: Ինչիս է պետք Նիկոլ Փաշինյանի ներողությունը: Եթե իշխանությունն ի վիճակի չէր դիմակայելու պատերազմին, ինչի տարավ «հանուն ոչնչի» երեխեքին զոհեց»,- ասաց 44-օրյա պատերազմի նահատակ Ժիրայրի մայրը:
Հիշեցնենք, այս աղմկահարույց բացահայտում արել էին հենց զոհվածների հայրերը՝ պատերազմից 7 ամիս անց՝ 2021 թվականի մայիսի 31-ին:
Հարազատները սահմռկեցուցիչ տեսարանը պատկերող կադրեր հանրայնացերցին՝ մարմինները պոլիէթիլենային տոպրակներով գետնին նետված վիճակում։
ՀՀ առողջապահության նախարարությունը հաստատել էր տեղեկությունը՝ նշելով, թե իբր մասունքներն անցել են համապատասխան նույնականացում և սպասում են, որ հարազատները վերցնեն’ հուղարկավորելու համար։ Բարձրացված մեծ աղմուկը մեղմելու համար թերեւս երկու օր անց՝ ՀՀ առողջապահության նախարարությունից հայտնեցին, թե դատաբժշկական գիտագործնական կենտրոնի Աբովյանի մասնաճյուղի վարիչն ու 2 աշխատակից ազատվել են աշխատանքից։ Ապա հայտարարվեց նաեւ քրեական գործ հարուցվելու մասին՝ ՀՀ քրեական օրենսգրքի 308-րդ հոդվածի 1-ին մասով՝ պաշտոնեական լիազորությունները չարաշահելու հատկանիշներով։ Հիմա արդեն ակնհայտ է, որ քրգործի հարուցումն ընդամենը նպատակ ուներ մեղմել հասարակական դժգոհությունը և ոչ թե զազրելի երեւույթի պատասխանատուների գործողություններին համարժեք քրեաիրավական գնահատական տալ։
