Հայաստանի դատաիվականա համակարգը «չթռավ Փաշինյանի գլխի վրայից» և այսօր հաստատեց Ազատ գյուղում հունվարի 19-ին տեղի ունեցած ողբերգական դեպքի «պատճառը», որի մասին դեպքից ժամեր անց հայտարարել էր Նիկոլ Փաշինյանը, այն է՝ հրդեհի պատճառն օգտագործված ավտոբենզինն է։
«Այս պահին դա ամենակենսունակ վարկածն է»,- ասաց Գլխավոր դատախազ Աննա Վարդապետյանը՝ պաշտպանելով Փաշինյանի առաջ քաշած վարկածը։
«Մյուս բոլոր վարկածները ստուգվում են, և բացառման կանոնով քննությունն իրականացվում է, բայց հիմնական վարկածը, որի շուրջ այս պահին քննությունն իրականացվում է, և կարծես թե այս պահի դրությամբ ունենք ապացույցների այն բազան, որով նաև մեղադրանք ենք առաջադրում, կառավարության նիստի ընթացքում հրապարակված հիմնական վարկածն է։ Բայց կրկնում եմ՝ բոլոր վարկածների ուղղությամբ քննությունն իրականացվում է, որպեսզի հետո հանկարծ չհնչեն կասկածներ, որ մենք որևէ վարկած չստուգեցինք, որը հանրությունը քննարկում էր»,- ասել է Վարդապետյանը։
Քննչական կոմիտեի նախագահ Արգիշտի Քյարամյանը ևս հաստատել է, որ հարցաքննություններով հիմնավորվում է վառարանը բենզինով վառելու նախնական վարկածը։
«Բոլոր վկաները, որոնք մինչ այս պահը հարցաքննվել են, ուղիղ վկայում են այն մասին, որ բենզինով վառարանը վառելու՝ ի սկզբանե առաջ քաշված վարկածը հիմնավորվում է։ Ասեմ ավելին՝ երկու օր առաջ օրապահը, որը անմիջականորեն ականատես է եղել դեպքին, ևս ցուցմունք է տվել և հիմնավորել է այդ վարկածը։ Այսինքն, ամեն ինչ շատ պարզ է, ու այլ բաներ փնտրելու ակնկալիքները, կարծում եմ՝ այնքան էլ ազնիվ չեն»,- նշել է Քյարամյանը։
Հիշեցնենք, որ ողջ մնացած 3 զինվորներից մեկը հարցազրույցի ժամանակ ասել է, որ զինվորներն առհասարակ բենզինով վառարան չեն վառում, այդ օրը՝ ևս։ Վառարան վառում են փայտի թեփով։ Բենզին չեն օգտագործում։
Նույն դեպքի վերաբերյալ մեկը՝ կացարանում եղած զինվորը, մանրամասներ է պատմում՝ որպես վկա և ականատես, իսկ վարչապետ Փաշինյանը, Գլխավոր դատախազն ու ՔԿ նախագահը նախնական վարկածով հերքում են նրա վկայությունը։
