Իսկ ինչու ո՞չ. ես էլ եմ եղել քաղաքապետի թեկնածու, բայց պարտվել եմ. Արփի Դավոյանի մասին
Իսկ ինչու ո՞չ, լրագրողների հետ ճեպազրույցում այսպես արձագանքեց ԱԺ նախագահ Ալեն Սիմոնյանը՝ պատասխանելով այն հարցին, թե ինչու արդարադատության նախարարի պաշտոնի համար նախ առաջադրեցին, ապա մերժեցին ՔՊ-ական պատգամավոր Արփի Դավոյանի թեկնածությունը:
Դիտարկմանը, որ նա իրավաբանական կրթություն չունի, ԱԺ նախագահն ասաց.
«Ես կարծում եմ, որ ունի բավարար գիտելիքներ: Խոսքը նրա մասին է, որ որևէ մեկը չկա, որ պետք է հնարավորություն չունենա մրցելու մնացածների հետ: Այսնիքն՝ պետք է ինչ-որ ձևով որևիցե մեկին այս կամ այն անձի ցանկությամբ ու գնահատականով սահմանափակվե՞նք: Մարդը ցանկություն հայտնեց մասնակցել այդ քննարկմանը, մասնակցեց, թիմի հետ քննարկեց այդ հարցը, և անցանք առաջ:
Ես էլ եմ եղել քաղաքապետի թեկնածու, բայց պարտվել եմ, չեմ կարողացել մրցակցել այդ ժամանակվա թեկնածուի հետ: Բայց դա չի նշանակում, որ ես քիչ գիտելիք ունեի կամ վատն եմ, էն մյուս թեկնածուն լավն է»:
Նշենք, որ այսօր ևս ՔՊ-ում քննարկվելու է արդարադատության նախարարի պաշտոնի համար թեկնածու առաջադրելու հարցը: Այս պահին շոշափվում է 4 թեկնածուի անուն՝ ՔՊ-ական պատգամավոր Արմեն Խաչատրյան, Երևանի փոխքաղաքապետ Սուրեն Գրիգորյան, վարչապետի խոսնակ Նազելի Բաղդասարյան և փաստաբան Ալեքսանդր Սիրունյան:
