Արտասովոր բան եղել է, ո՞նց չի եղել։ Ով ասեց, որ արտասովոր բան տեղի չի ունեցել։ Արտասովոր, անթույլատրելի բան է տեղի ունեցել, ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը՝ անդրադառնալով խորհրդարանում ՔԿ նախագահ Արգիշտի Քյարամյանի և ՔՊ-ական պատգամավոր Հովիկ Աղազարյանի միջև հայտնի վեճին։
Հարցին՝ հետևանքներ կլինեն, Սիմոյնանը պատասխանեց՝ սա թագավորություն չէ, որ թագավորը հրահանգի սրա գլուխը կտրել, նրան նետել բանը։
«Համակարգ է, պետություն է, կուսակցություն գոյություն ունի, այդպես չի լինում։ Հետևանքներ, բնականաբար, կլինեն»,-ասաց Ալեն Սիմոնյանը՝ արձագանքելով հարցին, թե արդյո՞ք ՔՊ-ում քննարկել են Արգիշտի Քյարամյանի հարցը։
Նա նշեց, թե «Քաղաքացիական պայմանագրում» թևեր չկան, կա միայն մեկ թև՝ Նիկոլ Փաշինյանի թևը։
«Մեկ անձի կուսակցություն չէ, մեր առաջնորդին սատարող խմբակցության պատկեր է, դրա մեջ որևէ տարօրինակ բան չկա»,- ամփոփեց ԱԺ նախագահը։
Դիտարկմանը՝ տպավորություն, որ ի տարբերություն Գրիգոր Մինասյանի՝ իշխանությունը խնայում է Արգիշտի Քյարամյանին, արդյոք մտավախություն այն չէ, որ Քյարամյանը կարող է ավելի շատ ինֆորմացիա բացահայտել։ Ի պատասխան՝ ԱԺ նախագահը նկատեց՝ ինքը չի կարծում՝ իրենց թիմն այնպես է աշխատել, որ նման մտավախություն լինի:
«Օրինակ՝ Ալեն Սիմոնյանի հետ կապված ինչ-որ բան եղավ, և ո՛չ պարոն Քյարամյանը, ո՛չ մնացած իրավապահները, ո՛չ դատարանը չհապաղեցին որևէ գործողություն անելուց: Դա խոսում է այն մասին, որ նման մտավախություն չկա:
Ինչ վերաբերում է խնայել-չխնայելում, ԱԺ-ն ՔՊ-ի իշխանության մի կարևոր թև է»:
Ալեն Սիմոնյանը միաժամանակ շեշտեց՝ եթե ինքը դահլիճում լիներ, նման իրավիճակ տեղի չէր ունենա։
«Ընդդիմությունը վերջին ընտրությունների ժամանակ եկավ էստեղ փրթենք-թափենք-սպանենք, գնդակահարենք տրամաբանությամբ, բայց կարողացանք հետները համագործակցել: Ճիշտ է, ես էլ եմ հաճախ ունենում էմոցիոնալ պորթկումներ, բայց կարծում եմ, որ որպես ԱԺ նախագահ՝ վատ չեմ իրականացնում իմ աշխատանքը»,- ասաց նա։
