Սա սովորական պայքար է իշխանության համար. իշխանությունները հասկացել են, որ ընտրություններում հաղթելու հավանականությունը բավականին քիչ է և փորձում են այդ հարցը նախապես լուծել, Azg.am-ի թղթակցի հետ զրույցում ասաց քաղաքագետ Արմեն Բաղդասարյանը՝ անդրադառնալով այսօր առավոտվանից ընթացող խուզարկություններին և ձերբակալություններին։
«Հայաստանում սովորաբար ինչպե՞ս է լինում. իշխանությունները որոշվում են ոչ թե ընտրություններով, այլ՝ նախքան ընտրությունները։ Իշխանության հարցը որոշվում է նախապես, և ընտրություններում դա արձանագրվում է։
Հիմա, այն, ինչ տեղի է ունենում այսօր (և վստահ եմ, որ առաջիկայում ևս շարունակություն կունենա, ավելին՝ ալիքը կուժեղանա), լուծում է եկող տարի կայանալիք ընտրությունների արդյունքների հարցը։ Հիմա է որոշվում՝ Նիկոլ Փաշինյանը կհասնի՞ մինչև ընտրություններ, թե ոչ։ Եթե նա կարողանա այս ալիքը հաջողությամբ ավարտին հասցնել, ընտրություններում որևէ պրոբլեմ չի ունենա, իսկ եթե ընդդիմությանը հաջողվի ընդվզման ալիք բարձրացնել, հակառակը տեղի կունենա՝ ընտրությունների հարցը կորոշվի հիմա։
Դրա համար էլ ասում եմ, որ այսօր Հայաստանում իշխանության համար պայքար է ընթանում։ Պարզապես իշխանություններն, օգտվելով սեփական լծակներից, ուժային կառույցներից, փորձում են ռեպրեսիվ, ուժային մեթոդներով այդ հարցն իրենց օգտին լուծել»,- ասաց Արմեն Բաղդասարյանը։
Հարցին՝ ընդդիմությունն այս պահին պոտենցիալ ունի՞՝ մոբիլիզացնելու հանրային դժգոհությունը և մարդկանց փողոց դուրս բերելու, մեր զրուցակիցը պատասխանեց՝ եթե այս հարցը հնչեր ընդամենը մեկ շաբաթ առաջ, ինքը կասեր, որ նման հնարավորություն տեսնում է։
«Որովհետև երբ Սամվել Կարապետյանը մտավ ակտիվ քաղաքականություն, նման հայտ ներկայացրեց, հույս կար, որ նա կգա և կկարողանա մոբիլիզացնել հասարակությանը։ Բայց նա, կարծում եմ, սխալվեց։
Նիկոլ Փաշինյանի և խորհրդարանական ընդդիմության վարկանիշները, միասին վերցրած, ընդամենը 30 տոկոս են։ Հասարակության 70 տոկոսը հավասարապես հոգնած և հիասթափված է և՛ իշխանությունից, և՛ խորհրդարանական ընդդիմությունից։ Քանի որ Սամվել Կարապետյանն ունի և՛ հսկայական նյութական, և՛ մարդկային, և՛ կազմակերպչական ռեսուրսներ և բացի այդ՝ վարկաբեկված չէ, նա շանս ուներ գալու Հայաստան և համախմբելու այն 70 տոկոսին։
Բայց նա սխալվեց. խաղադրույք կատարեց ոչ թե իշխանությունից և ընդդիմությունից հավասարապես հիասթափված այն 70 տոկոսի վրա, այլ իր հենարան հռչակեց ԱԺ ընդդիմությանը՝ Ռոբերտ Քոչարյան, Սերժ Սարգսյան, ՀՅԴ և այլն։ Դրանով նա պարտվեց հիմնական՝ բացասական վարկանիշ չունենալու իր հաղթաթուղթը։ Կանգնելով նրանց կողքին՝ Սամվել Կարապետյանը կարող է ունենալ շատ մեծ բացասական վարկանիշ։ Կարծում եմ՝ նա այստեղ սխալվեց, սակայն գուցե դեռ ուշ չէ սխալն ուղղելու համար։ Ամեն դեպքում, նման շանս կար»,- ասաց քաղաքագետը։
Արմեն Բաղդասարյանն ընդգծեց՝ Սամվել Կարապետյանի համար պետք է շատ լավ օրինակ լիներ Բագրատ Սրբազանի՝ անցյալ տարի նախաձեռնած հզոր շարժման ձախողումը։
«Նա հազարավոր մարդկանց առաջնորդեց և բերեց Հանրապետության հրապարակ, բայց բոլորս էլ հիշում ենք՝ ինչ տեղի ունեցավ։ Ռոբերտ Քոչարյանի, Սերժ Սարգսյանի և Դաշնակցության կողմնակիցները գնացին, կանգնեցին նրա կողքը, և շարժումը մարեց։ Հիմա նույն կերպ վարվում է Սամվել Կարապետյանը։ Նա այդ սխալը չպետք է թույլ տար»,- ամփոփեց մեր զրուցակիցը։
Հիշեցնենք, որ այսօր դիմակավորված անձինք խուզարկություն են իրականացրել և իր կեցավայրից բերման են ենթարկել Բագրատ Սրբազանին։ Այս պահին նա Քննչական կոմիտեում է։
Այսօր առավոտյան ԱԱԾ-ն խուզարկություններ է իրականացրել նաև գնդապետ Միհրան Մախսուդյանի, «Վերածնվող Հայաստան» կուսակցության նախագահ Վահե Հակոբյանի, զոհված զինծառայողի ծնող Արա Ռոստոմյանի տներում։ Թեև խուզարկություններից որևէ մեկի ընթացքում անօրինական իրեր չեն առգրավվել, սակայն Բագրատ Սրբազանը, Միհրան Մախսուդյանը, Արա Ռոստոմյանը և Վահե Հակոբյանի կինը՝ Էլիզաբեթ Պետրոսյանը, բերման են ենթարկվել։
