Մամուլում դավադիր լռության մատնվեց «Հայոց արծիվներ. միասնական Հայաստան» կուսակցության նախկին փոխնախագահ, Haynews.am լրատվական կայքի սեփականատեր եւ գլխավոր խմբագիր ՄՀԵՐ ԵՂԻԱԶԱՐՅԱՆԻ մահվան երկրորդ տարելիցը: Մինչդեռ նա գործող իշխանության առաջին «զոհն» էր, ում ձայնը խլացվեց «թավշյա» աղմուկի մեջ:
Հիշեցնենք, որ նա, համարելով անարդար իր անազատության մեջ գտնվելը, հացադուլ հայտարարեց եւ այսօր արդեն խորհրդանշական դարձած 44 օր մնաց հացադուլի մեջ: Ապա դուրս գալով հացադուլից` 10 օր հետո ինքնազգացողությունը կտրուկ վատացավ եւ մահացավ 2019թ. հունվարի 26-ին` «Նուբարաշեն» ՔԿՀ-ի բժշկական սպասարկման բաժնի ստացիոնար հիվանդասենյակում` այդպես էլ չհասնելով արդարության: Դեռեւս նախորդ տարի մամուլում հայտնվեց տեղեկատվություն, թե Քննչական կոմիտեն որոշել է վերաբացել Մ. Եղիազարյանի մահվան հանգամանքներին վերաբերող քրեական գործը եւ նոր քննություն է սկսել, ուստի` թե որքանով է այն համապատասխանում իրականությանը, վերոնշյալ դեպքից երկու տարի անց` քնությունն ի՞նչ է պարզել: Եվ ինչպես է բացատրվում այն, որ Էրեբունի եւ Նուբարաշեն վարչական շրջանների քննչական բաժինը շուրջ տարիուկես գործը քնեցնելուց հետո` դատաբժշկական քննության եզրակացությունը ստանալուն պես` շտապ կարճել էր հարուցված քրեական գործը: Կամ ՀՀ առողջապահության նախարարության դատաբժշկական գիտագործնական կենտրոնի 15 էջից բաղկացած եզրակացության մեջ որեւէ նոր հանգամանքներ քննության հետագա ընթացքի համար արդյոք պարզվե՞լ է: «Իրավունքը» վերոնշյալ մի շարք հարցերով դիմեց Քննչական կոմիտե, որտեղից ստացանք հետեւյալ պատասխանը. «2019 թ. ապրիլի 15-ին Մ. Եղիազարյանի մահվան դեպքի առթիվ հարուցված քրեական գործով նշանակվել է հանձնաժողովային դատաբժշկական փորձաքննություն, եւ մինչ եզրակացությունը ստանալը` քրեական գործով վարույթը կասեցվել է: 2020 թ. մայիսի 13-ին ստացվել է հանձնաժողովային դատաբժշկական փորձաքննության եզրակացությունը, համաձայն որի` Մ. Եղիազարյանի հացադուլի ժամանակ, դրանից հետո ՀՀ ԱՆ «Նուբարաշեն» ՔԿՀ-ի ստացիոնար բուժում ստանալու, ինչպես նաեւ ՀՀ ԱՆ «Էրեբունի» բժշկական կենտրոնում բուժաշխատողների կողմից հետազոտությունների ընթացքում բուժօգնություն ցուցաբերելիս թերություններ եւ բացթողումներ, որոնք նրա մահվան հետ գտնվեին պատճառական կապի մեջ, չեն հայտնաբերվել: 2020 թ. մայիսի 13-ին քրեական գործով կասեցված վարույթը վերսկսվել է, վերը նշված եզրակացությունը ծանոթացվել է տուժողի իրավահաջորդին եւ քրեական գործով վարույթը կարճվել է ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի հիմքով»:
Ահա եւ Նիկոլի իշխանության օրոք մարդու կյանքի արժեքը. տարուց ավել շարունակվող պարզ դատաբժշկական փորձաքննություն, ու հետո պարզվում է, որ թեեւ մարդը մահացել է, սակայն որեւէ մեկը մեղավոր չէ: Մնում է հուսալ, որ Նիկոլից հետո այս մահվան քրգործը նորից կքննվի, նաեւ նախկին քննիչների դերակատարման փաստի ներառմամբ:
