Այո,՛ երևի թե ավելի շուտ էր պետք այս հայցը ներկայացնել, բայց մարդը ՔԿՀ-ում է, և գուցե նաև դա է եղել պատճառը, որ ավելի ներողամիտ ենք գտնվել։ Լրագրողների հետ զրույցում այսօր այս մասին ասաց Առողջապահության նախարար Անահիտ Ավանեսյանը՝ անդրադառնալով Բագրատ սրբազանի դեմ իր ներկայացրած հայցին։
«Ժողովրդի հասցեին անպարկեշտ արտահայտությունների մասով մենք ևս վիրավորված ենք զգում, ես ՝ որպես ժողովրդի մաս կազմող անհատ, և պարզվեց, որ ինձ նման հազարավոր մարդիկ կան, որ վիրավորված են զգում »,- ասաց նախարարն՝ ի պատասխան հարցի՝ միայն վեց ամիս հետո՞ է իրեն վիրավորված զգացել ՔԿ-ի հրապարակած ձայնագրություններում լսվող «անասուն» բառից։
Ըստ Ավանեսյանի՝ պարզվեց անձը հեշտությամբ դատի է տալիս, և խոսքի ազատության ճնշման փորձեր են արվում։
«Եվ, կարծում եմ, պետք է հակադարձ դիրքորոշում ձևավորել և արտահայտել։ Իհարկե, մենք իրավաբանների հետ քննարկումների մեջ ենք, առաջիկայում տեղեկատվություն կտրամադրեմ»,- ասաց նախարարը։
Լրագրողները նաև հետաքրքրվեցին՝ նախարարը նույնքան վիրավորվա՞ծ է Աննա Հակոբյանի՝ ժողովրդի հասցեին հնչեցրած այնպիսի արտահայտություններից, ինչպիսիք են՝ «տգետներ», «ոջիլ», «մեռելի զդաչի» և այլն։
«Տեսեք, պետք է տարբերակել։ Տիկին Հակոբյանի գրառումները հենց դրան են վերաբերել, որ բավական է վիրավորեք, անպարկեշտ արտահայտություններ անեք»,- ասաց նախարարը։
Հաջորդ հարցին՝ ինչո՞ւ որոշեց լինել ՔՊ վարչության անդամ և ինքնաառաջադրվել, Անահիտ Ավանեսյանը պատասխանեց՝ մշտապես մատահոգված է եղել Հայաաստանում ժողովրդավարական, սոցիալական երկիր կառուցելու օրակարգով,և քաղաքականությունն այն է, ինչը թույլ է տալիս իրագործել այդ նպատակները։
«Կարծում եմ՝ ունեմ շանսեր։ Իհարկե, դեռ քարոզչական ընթացքն առջևում է»,- ասաց նա։
