Ես դեմ եմ եղել նախկին իշխանությանը, և դրա համար Նիկոլ կլիներ, Պողոս Երվանդյան կլիներ, ով ուզում է լիներ, նա անցնելու էր, այսօր լրագրողների հետ զրույցում նշեց Գյումրիի քաղաքապետ Վարդան Ղուկասյանը՝ անդրադառնալով նրան, որ 2018–ին, աջակցում էր հեղափոխությանը և բղավում էր «Քայլ արա, մերժիր Սերժին»։
«Ոչ թե Փաշինյան Նիկոլը այդքան ձայներ ունի, այլ նախկինների ատելությունից ժողովուրդը ուզեցել է պրծնել և ընտրել է Նիկոլ Փաշինյանին։ Դա բոլորը լավ գիտեն, իրենք էլ լավ գիտեն։ Հիմա ինձ ասել՝ թե դուք ՔՊ-ին պաշտպանեցիք… ես, ՔՊ-ի վարքագիծը տեսնելով, երբեք չեմ իրեն պաշտպանի։ Մի խոսքով, ես դեմ եմ եղել նախկին իշխանությանը»,–ասաց նա։
Դիտարկմանը, որ նախկինները աջակցեցին՝ ինքը դառնա քաղաքապետ, Վարդան Ղուկասյանը կտրականապես չհամաձայնեց։
«Սխալվում եք, դուք այդպես ուզում եք, այդպիսի հանձնարարական եք ստանում, որ ինձ կապեն նախկինների հետ։ Ես նախկինների հետ կապ չունեմ, ուղղակի չորս ղեկավարների մեջ հարգել եմ Ռոբերտ Քոչարյանին։ Երևանյան քաղաքական խաղերից շատ հեռու եմ ես»,- ասաց նա։
Հարցին՝ դատարանն իր նկատմամբ 5 միլիոն դրամ գրավ կիրառեց, հեշտությա՞մբ կվճարի այդ գումարը, ունի՞ այդքան գումար, Ղուկասյանը պատասխանեց՝ ինքն այնքան հարգանք ունի, որ աշխարհի որ երկիր էլ զանգահարի և ասի, որ իրեն 500 000 դոլար է պետք, երկու րոպե հետո կբերեն, կտան։
Անդրադառնալով իր որդուն՝ Վարդան Ղուկասյանն հիշեցրեց՝ արդեն չորրորդ անգամն է, որ նրան տանում, պահում ու բաց են թողնում, քանի փաստերը իրականությանը չեն համապատասխանում։
«Իմ որդին կրակն է ընկել իր հոր ձեռքը, որ իր հերը չի գնում պետության հետ համագործակցության։
Բոլոր գործերը բացեք, նայեք, բաց են թողել, ասել են փաստերը չկա, անհիմն է։ Սա էլ նույնությամբ, դրանից առաջ յոթ ամիս տարան պահեցին, վերջում տակը մնացին։
Երբ որ տեսնում են՝ քաղաքը խաղաղ է, հատուկ պետությունը կռիվ է գցում ջահելների մեջ, որպեսզի դրանց մեջ քաղաքական իր գործունեությունը ծավալի։ Գյումրին էնքան խաղաղ ու հանգիստ է, հիմա էլ մեկը հայտնվել է, ասում է՝ Գյումրիում հանցագործությունը շատացել է։ Էլ պատվեր են ստացել։
Նապոլեոնն ասում էր՝ ես երկու լրագրողից ավելի շատ եմ վախենում, քան 100 հազարանոց բանակից: Այսինքն՝ ինչ ուզենաք՝ կներկայացնեք. սպիտակը սև կներկայացնեք, սևն էլ սպիտակ։ Հիմա մենք ի՞նչ անենք, ձեր ձեռքը կրակն ենք ընկել: Հիմա որ ձեզ դատի չենք տալիս, մեղավո՞ր եմ։ Ես դատի տալ չեմ սիրում»,- ասաց նա։
