Այսօր կայացած մամուլի ասուլիսի ժամանակ լրագրողներից մեկը Արմեն Մելիքբեկյանից հետաքրքրվեց ՈՒՖԵԱ-ի Գործադիր կոմիտեի անդամի պաշտոնում ՀՖՖ նախագահի աշխատավարձի մասին: Հարցն ակնհայտորեն դուր չեկավ Մելիքբեկյանին:
«Իմ աշխատավարձը ՈՒԵՖԱ-ում 20.000 եվրո չէ, չեմ կարող հրապարակել, թե որքան է, կոնֆիդենցիալ է: Որտեղի՞ց Ձեզ այդ տեղեկությունը: Ստում եք: Այն լրատվամիջոցները, որոնք այդ մասին գրում են, փաստարկված չի: Եթե դա ասում է Արթուր Սողոմոնյանը, սուտ է: Առհասարակ, Արթուր Սողոմոնյանի կողմից ասված յուրաքանչյուր խոսք, սուտ է և ոչ հիմնավոր: Նա չի կարող որևէ ճիշտ խոսք ասել հայկական ֆուտբոլի մասին: Այս ամենը փոքրիկ մանիպուլյացիաներ են:
Հարցին, թե ինչով է ինքն ավելի «լավը» ՀՖՖ նախկին նախագահ Ռուբեն Հայրապետյանից, որ իր թիմակիցները ստիպեցին հրաժարական տալ, Արմեն Մելիքբեկյանն այդպես էլ չպատասխանեց:
«Ես ոչ մի թիմից չեմ, ինձ որևէ թիմի հետ չկապել: Երևի լավ չեք տիրապետում իրավիճակին»,- ասաց նա:
ՀՖՖ նախագահը նաև անդրադարձավ պայմանավորված խաղերի, ԲԿՄԱ-ի միջոցով բանակային ծառայությունից ազատելու մեղադրանքների, վերջին շրջանում շրջանառվող «Գանձասար» – ԲԿՄԱ հնարավոր պայմանավորված խաղի մասին:
«ՀՖՖ-ն եղել է առաջին կառույցը, որը պայքարել է պայմանավորված խաղերի դեմ: «Գանձասար» – ԲԿՄԱ խաղի մասով, եթե ստանանք փաստաթուղթ ՈՒԵՖԱ-ից, որը մեզ հնարավորություն կտա որակազրկել և քրեական գործ հարուցել, մեծ սիրով դա կանենք»,- նշեց Արմեն Մելիքբեկյանը:
Հայաստանի ֆուտբոլի ֆեդերացիայի նախագահը նաև շեշտեց՝ ինքն առաջինն է շահագրգռված, որ Հայաստանը 2050 թվականից էլ շուտ լինի Եվրոպայի կամ Աշխարհի առաջնության մրցանակակիր։
«Մինչև 2050 թվականը շատ ժամանակ կա, ես առաջին շահագրգռվածն եմ, որ Հայաստանը 2050 թվականից էլ շուտ լինի մրցանակակիր»,- ասաց նա՝ նշելով, որ այդ ամենի համար անհրաժեշտ է շատ քայլեր անել։
Նշենք, որ վարչապետ Նիկոլ Փաշինյանն էր հայտարարել՝ մինչև 2050 թվականը ֆուտբոլի Հայաստանի հավաքականը պետք է դառնա Աշխարհի կամ Եվրոպայի առաջնության մրցանակակիր։
