Նիկոլ Փաշինյանն այսօր ընթացող մամուլի ասուլիսի ժամանակ հայտարարեց՝ Գարեգին Բ-ին մոտ կանգնած և պաշտոնապես եկեղեցուն ծառայող մի անձ գրառում է կատարել այն մասին, որ ինքը՝ ՀՀ վարչապետը, թլպատված է, և դա խոսում է այն մասին, որ վարչապետը ստում է՝ ասելով, թե ինքը Հայ Առաքելական եկեղեցու հետևորդ է կամ ընդհանրապես քրիստոնյա է։
Ըստ Փաշինյանի՝ եթե Ամենայն Հայոց Կաթողիկոսը կարող է «շոշափել» վարչապետի «օրգանները», ապա վարչապետը կարող է հասարակության առաջ պաշտպանել իր հավատը, իր սկզբունքները և իր հոգևոր պարկեշտությունը։
«Ինչո՞ւ ոչ ոք չի խոսում, թե հոգևոր ծառայություն իրականացնող անձն ինչ առնչություն ունի վարչապետի օրգանների հետ։ Ի՞նչ պետք է սովորեն երեխաները հոգևոր կրթական հաստատություններում։ Երբ վարչապետի հասցեին վիրավորանքներ են հնչում՝ այդ ժամանակ նա երկրի ղեկավար չէ, իսկ երբ նա սկսում է իրեն պաշտպանել, հայտարարում են. «Ինչո՞ւ է նա այդպիսի բան ասում»։ Երբ վարչապետի օրգանների հետևից են ընկնում, նա այդ պահին պետության ղեկավար չէ։ Իսկ երբ նա նման փաստարկ է բերում, որպեսզի շարունակություն չլինի, բոլորը հիշում են, թե ինչ կարող են սովորել երեխաները», – ասաց Փաշինյանը։
Նրա համոզմամբ՝ երեխաները պետք է սովորեն, որ ճշմարտությունն ու սկզբունքները պետք է պաշտպանել։
