Արցախի արտաքին գործերի նախարարի պաշտոնակատար Դավիթ Բաբայանը կարևորում է Լեռնային Ղարաբաղում տեղակայված ռուս խաղաղապահներին միջազգային մանդատ տալը, որպեսզի նրանք խաղաղապահ առաքելությանը զուգահեռ՝ խաղաղություն պարտադրելու լիազորություն ունենան։
«Եթե չլիներ ռուսական խաղաղապահ առաքելությունը, Արցախը վաղուց կործանված կլիներ. մյուս կողմից՝ մենք տեսնում ենք, որ մանդատի անմիջական ածանցյալ խաղաղապահ առաքելության ներուժը պետք է ուժեղացվի»,- ընդգծեց Բաբայանը։
Նա հավելեց, որ իրենք առաջարկներ ունեն տարբեր ատյաններում հնչեցրած տեսակետից՝ առաջին հերթին պետք է ավելանա ռուս խաղաղապահների թիվը։ Բաբայանի խոսքով՝ 1980 մարդը չի կարող ամբողջությամբ կատարել այդ գործառույթը.
«Շուշիի հատվածում ընդամենը մի քանի խաղաղապահ կա։ Հետեւաբար, առաջին քայլը թվի ավելացումն է։ Երկրորդ՝ նրանք պետք է ստանան միջազգային մանդատ։ Դա կնշանակի, որ նրանք պետք է իրավունք ունենան խաղաղապահ առաքելության հետ մեկտեղ՝ ապահովել խաղաղություն, ինչպես դա եղավ Կոսովոյում և Բոսնիայում։ Այնտեղ խաղաղապահ է կանգնած, եթե մի խումբ մարդիկ մոտենում են, զգուշացնում են, որ չմոտենան, եթե շարունակեն, կարող են նաեւ ուժ կիրառել»,- ասաց Բաբայանը։
ԱԳ նախարարի պաշտոնակատարը նշեց, որ ռուս խաղաղապահները նման լիազորություններ չունեն, դրա համար պետք է լինի միջազգային մանդատ։
Բաբայանն ընդգծեց, որ Արցախի ճակատագիրը նաև քաղաքակիրթ աշխարհի ճակատագիրն է. «Ժողովրդավարական հասարակությունը չի կարող հանդուրժել չճանաչված ժողովրդավարական երկրի ոչնչացումը տոտալիտար երկրի կողմից։ Ուստի, բոլորը պետք է մի կողմ դնեն իրենց աշխարհաքաղաքական նախասիրությունները եւ գործեն, որ ցեղասպանություն չլինի։ Իսկ դա հնարավոր է միայն այս մանդատը փոխելով»,- ասաց նա։
