«Սննդամթերքի անվտանգության տեսչական մարմինը պարզապես իրականցնում է իր հերթական վերահսկողական գործողությունը մսի շուկայում»,- հայտնել է տեսչական մարմնի խոսնակ Անուշ Հարությունյանը՝ անդրադառնալով այսօր առավոտյան Գումի մսի շուկայում տեղի ունեցած դեպքերին։
«Այսօր որևէ արտառոց, նոր բան մեր կողմից չի արվել, որովհետև մենք հերթական ստուգման ենք գնացել։ Միակ տարբերությունն այն է եղել, որ մենք հիմնականում ստուգման ենք գնում աշխատանքային ժամերին։ Այսօր 9–ից շուտ ենք գնացել, որ հասկանանք, թե Խորենացի շուկայում միսը որտեղից է բերվում, ինչ ձևով։ Եթե տեսնեիք, թե միսն ինչ մեքենաներով և ոնց են բերում այդ շուկա, արդեն զզվելի է։ Մենք ամեն օր այդ բողոքը ստանում ենք քաղաքացիներից։ Մենք չենք կարող 200-300 իրացման կետի, տնտեսվարողի օգուտը վերադասել մարդկանց առողջությունից»,–ասաց Հարությունյանը։
Նախորդ տարվա դեկտեմբերին օրենքով հաստատվել է, որ ՍԱՏՄ–ն ոչ սպանդանոցային ծագման միսը կարող է առգրավվել և ոչնչացնել, իսկ այս տարվա աշնանը հաստատվել է դրա իրականացման կարգը։
«Ինչպես պահանջում է օրենքը, և արդեն հաստատված կարգը, ոչ սպանդանոցային միսը պետք է առգրավվի և ոչնչացվի։ Առգրավում է ՍԱՏՄ տեսուչը, կշռում է, այն հանձնվում է տեղափոխող կազմակերպությանը, վերջինն էլ այն հանձնում է այրող կազմակերպությանը, որն էլ այրում է ոչնչացման ենթակա միսը»,- ասաց Ա. Հարությանը։
Տեսչական մարմնից նշեցին, որ իրենց գործողությունները միտված են քաղաքացիների առողջության պահպանմանը, որպեսզի իրենց սեղաններին չհայտնվի վտանգավոր սննդամթերք, այդ թվում միս։
«ԳՈՒՄ»-ի շուկայից մոտ 1 տոննա միս է առգրավվել, որը ենթակա է ոչնչացման: Ամեն ինչ արվում է օրենքի շրջանակում, հաստատված կարգերի համաձայն»,- ասաց ՍԱՏՄ մամուլի խոսնակ Անուշ Հարությունյանը։
