Գումի շուկայում, որտեղ ՍԱՏՄ ներկայացուցիչները վաղ առավոտից կարմիրբերետավորների հետ համատեղ արգելում են առևտուրը և առգրավում մսավաճառների միսը, ինչ-որ պահի իրավապահների և մսավաճառների միջև քաշքշուկ սկսվեց: Մսավաճառներից մեկը հանեց կրակայրիչը և ցանկանում էր ինքնահրկիզվել: Մեկ այլ մսավաճառի ինքնազգացողություն էլ վատացավ: Ոստիկանները բերման ենթարկեցին մի քանի առևտրականի։
Մսավաճառներից մեկը, ներկայացնելով իրավիճակը, պատմեց, որ իրենցից սպանդանոցային մորթի մասին փաստաթուղթ են պահանջում, բայց իրենց համայնքում սպանդանոց ուղղակի չկա։
«Ինձ ասում են՝ մի դիմադրեք, մեկ է, տանելու ենք: Ասում են՝ տանելու ենք վառենք: Ես էլ ասում եմ՝ կարո՞ղ ենք տեսնել, որ վառում եք, ոչ թե տանում եք մեջ-մեջ անեք: 500-600 կիլոգրամանոց կենդանու մարմինը տարել են: Ասում եմ՝ եկեք գնանք Վեդի, եթե ինձ ցույց տաք սպանդանոց, միսը տարեք, ինձ էլ տուգանեք: Եթե սպանդանոց չկա, ո՞նց եք պարտադրում, որ սպանդանոցի թուղթ ունենանք»,- ասաց մսավաճառը:
Առևտրականներից մեկն էլ նշեց, որ ինքն այստեղ աշխատում է արդեն 4-5 ամիս, և այս ընթացքում ոչ մի անգամ ՍԱՏՄ-ից ստուգումների չեն եկել, մինչդեռ Նոր տարվա շեմին եկել են և միսն առգրավում են:
ՍԱՏՄ անասնաբուժության վարչության պետի տեղակալ Արթուր Մելիքյանն էլ իր հերթին հայտարարեց, որ իրենք ստուգում են իրականացնում, և եթե չկա սպանդանոցային մորթի մասին փաստաթուղթը, ապա միսը պետք է առգրավեն:
Ի պատասխան՝ մսավաճառը պնդեց, որ իրեն ցույց տան Արարատում գործող որևէ սպանդանոց։
«Եթե կա ցույց տվեք»,- ասաց նա:
Մելիքյանն էլ ասաց, որ սպանդանոցների ցանկը հրապարակված է:
Վիճաբանությանն արձագանքեց նաև իրավապահներից մեկը։ Նա խորհուրդ տվեց՝ եթե մսավաճառները չեն կարողանում սահմանված պահանջները բավարարելով գործունեություն ծավալել, ապա թող չզբաղվեն այդ աշխատանքով։
