Արցախի հարցը փակված չէ և չի կարող փակվել, քանի դեռ Արցախի ժողովուրդը զրկված է իր պատմական հայրենիքում արժանապատիվ կյանքի իրավունքից։ Այս մասին «Արցախ. չլուծված հակամարտություն, վերադարձի իրավունք» միջազգային համաժողովում հայտարարել է ՀՀ ԱԺ պատգամավոր, ՀՅԴ ներկայացուցիչ Իշխան Սաղաթելյանը։
Ըստ նրա՝ ուժի կիրառմամբ կամ սպառնալիքով պարտադրված որևէ փաստաթուղթ չի կարող համարվել լեգիտիմ, և Արցախի ճակատագրի շուրջ կայացված ոչ մի որոշում չի կարող ունենալ իրավական ու քաղաքական ուժ՝ առանց արցախահայությնա անմիջական մասնակցության։
« Վերադարձի և ինքնորոշման իրավունքները հիմնարար իրավունքներ են, որոնք չեն կարող անտեսվել կամ առևտրի առարկա դառնալ»,- ասաց պատգամավորը՝ հավելելով, որ Ադրբեջանն ու Թուրքիան շարունակում են իրենց քայլերը Հայաստանի դեմ, իսկ ՀՀ իշխանությունները փորձում են պարտությունը ներկայացնել որպես խաղաղություն։
«Մենք պետք է արդարություն պահանջենք և ձևավորենք միջազգային համախմբվածություն՝ մեր ժողովրդի իրավունքները պաշտպանելու համար։
Նիկոլ Փաշինյանը Արցախը հանձնելն արդարացնում է ՀՀ ինքնիշխանության պահպանմամբ, բայց իրավիճակն այնպիսին է, և միջանցք տրամադրելը ներկայացվում է որպես Սյունիքը պահպանելու միակ հնարավորություն։ Արցախի հարցը վերաբերում է ողջ տարածաշրջանի խաղաղությանը։ Եթե անտեսենք արցախցիների վերադարձի իրավունքը, շարունակենք լռել Արցախում էթնիկ զտումների, հուշարձանների ոչնչացման մասին, եթե միջազգային հանրությունը շարունակի լռել գերիների հարցի շուրջ, եթե ադրբեջանական զորքերը շարունակեն մնալ ՀՀ ինքնիշխան տարածքում, ապա մեզ խաղաղություն չեն առաջարկում, այլ էլ ավելի վատ կապիտուլյացիա», – շեշտեց Սաղաթելյանը։
