Որքան էլ ես համաձայն եմ ավտոբուսների վարորդների դրած պահանջներին, բայց երեկ նրանց կողմից իրականացված գործողությունները գործադուլ չէին. ցավոք, դրանք անօրինական գործողություններ էին, «Երևանի հասարակական տրանսպորտի ճգնաժամն ու վարորդների գործադուլը» թեմայով քննարկման ժամանակ այսօր ասաց Հայաստանի արհմիությունների կոնֆեդերացիայի նախագահ Էլեն Մանասերյանը։
Նրա հավաստմամբ՝ կասկածից վեր է, որ վարորդները արտահագուստի, աշխատանքային պայմանների, հիգիենայի պահպանման, աշխատանքային ռեժիմի հետ կապված բազմաթիվ խնդիրներ ունեն, բայց երեկվա նրանց գործողություններն այն միջոցը չէին, որին պետք է վարորդները դիմեին։
«Գործադուլ հայտարարելու իրավունք ունի բացառապես արհեստակցական կազմակերպությունը։ Գործատուին պետք էր նախապես ծանուցել գործադուլի օրվա, ժամի, վայրի մասին։ Հասարակական տրանսպորտի գործատուն գործադուլի մասին պետք է տեղեկացված լիներ առնվազն 14 օր առաջ»,- ասաց բանախոսը՝ հիշեցնելով, որ ավտոբուսների վարորդները դեռևս մայիսին առաջարկ էին ստացել արհմիություն ստեղծելու, որն էլ պատշաճ կներկայացներ նրանց բողոքները, այնինչ այդ առաջարկին հետամուտ չեն եղել։
Էլեն Մանասերյանի խոսքով՝ որքան էլ բողոքի գործողությունները սպոնտան բնույթ կրեն և իրական բողոքի պատկեր ներկայացնեն, աշխատողներն իրենց չիմացության պատճառով հայտնվում են և երեկ էլ հայտնվեցին բարդ իրավիճակում։
