Այս ամենը ոչ այլ ինչ է, քան վախի տարածում։ Փորձում են մարդկանց էմոցիոնալ առումով կոտրել, ցույց տալ ոստիկաանապետության ներկայությունը, լրագրողների հետ զրույցում ասաց Գյումրիի ավագանու անդամ, պրոդյուսեր Ռուբեն Մխիթարյանը՝ անդրադառնալով այսօր առավոտվանից Գյումրիում տեղի ունեցող իրադարձություններին և դրանց հաջորդած ձերբակալություններին։
Ըստ նրա՝ իշխանությունը կարողանում է կատարել իր դիմաց դրված խնդիրները, իսկ այն գործիքակազմը, որից օգտվում է ընդդիմությունը, 7 տարի իրեն չի արդարացնում։
«Եթե Հակակոռուպցիոնի խնդիր կար, չեմ կարծում՝ քաղաքապետին ծանուցեին, ինքն ինքնուրույն չէր ներկայանա։ Այս տեսարանների ցուցադրությունը գյումրեցիների վրա մարդ բերել էր, վախեցնելու գործիքակազմ։ Բայց վստահ եմ, որ գյումրեցիներին վախեցնել հնարավոր չէ։ Էս ամեն ինչը մի նպատակ ուներ՝ տեսարան ապահովվել։ Այսինքն՝ արդեն էական չէ՝ հրապարակում կանգնած ինչ ես արել, այլ այն, որ ինչ-որ բանի հետ համաձայն չես եղել»,- ասաց Մխիթարյանը։
Նա միաժամանակ համոզմունք հայտնեց՝ ՔՊ-ի կողմից ցանկացած բան արվում է քաղաքապետի սեփական թեկնածուներին, պատգամավորներին ֆորա տալու և սեփական վախերը քողարկելու համար։
Անդրադառնալով սպասվելիք խորհրդարանական ընտրություններին՝ Ռուբեն Մխիթարյանն ասաց՝ ամեն ինչ կարող է ընտրությունների չհասնել, կարող է ներքին պայթյուն տեղի ունենալ։
«Ընտրություններն իրենց համար ամենացանկալի կոնֆիգուրացիան են, որովհետև լիուլի օգտագործելու են վարչական ռեսուրսները, իսկ ահա ներքին պայթյունը կարող է բերել անկանխատեսելի հետևանք»,- ասաց Մխիթարյանը։
