Ի դեպ ասեմ, որ ևս մի դատական հայց եմ ներկայացնելու. հեղինակը կա՛մ կուսակցությունն է, կա՛մ եթե անձն է՝ անձը, որովհետև երեկ «Արմենիա» հեռուստաընկերության տված հարցազրույցից հետո նրանք հայտարարել են, որ ես հաստատել եմ, որ 300 000 ադրբեջանցի է վերադառնալու կամ գալու բնակեցվելու է Հայաստանում։ Այս մասին այսօր լրագրողների հետ ճեպազրույցի ժամանակ նշեց ՀՀ վարչապետ Նիկոլ Փաշինյանը՝ անդրադառնալով «Ուժեղ Հայաստան» կուսակցությանը և նրա առաջնորդ Սամվել Կարապետյանին։
«Ես այդ կապակցությամբ երրորդ հայցը կներկայացնեմ, և այս անգամ արդեն գործ ունենք հրապարակային հարցազրույցի հետ՝ առավել ևս ակնհայտ է որ երրորդ ներողությունը պետք է խնդրի Սամվել Կարապետյանը։ Եթե նա արդեն սկսել է անհանգստանալ դատական հայցագնի վերաբերյալ, նշանակում է՝ իր հարստության չափերի մասին լուրերը խիստ չափազանցված են»,- ասաց Փաշինյանը։
Անդրադառնալով գաղտնալսումներից մեկին, որտեղ նշվում է, որ որ եթե անգամ Նիկոլ Փաշինյանը հաղթի՝ ընդդիմադիրները գնալու են «պերեվարոտի», Փաշինյանն նկատեց.
«Հայաստանի իրավապահ և ինստիտուցիոնալ համակարգը բավարար չափով կայացած է, որպեսզի բնում խեղդի ցանկացած հեղաշրջման փորձ։ Իսկ եթե Ռոբերտ Քոչարյանն այնքան է իրականության զգացումը կորցրել, որ մտածում է՝ ՀՀ ընտրություններում կարող է հաղթել, դրա վերաբերյալ անիմաստ եմ համարում որևէ մեկնաբանություն ասել։ Մնում է միայն կարեկցել այդ մարդուն»։
»։
