Գյումրու «Գալերի 25» պատկերասրահում հունիսի 7-ին բացվել է քաղաքիս նվիրյալ երախտավոր, ՀՀ վաստակավոր ճարտարապետ Ռաֆիկ Եղոյանի տարբեր տարիների գեղանկարչական աշխատանքների ցուցահանդեսը:
Արգասավոր աշխատանքային ուղի անցած 93-ամյա վարպետը 1961 թվականից եղել է «Հայպետնախագիծ» ինստիտուտի տեղի մասնաճյուղի, 1990-ից՝ «Երեւաննախագիծ» ինստիտուտի «Գյումրի» արվեստանոցի գլխավոր ճարտարապետը, 1964-1977 թվականներին՝ միաժամանակ Գյումրու գլխավոր ճարտարապետը: Նրա ստեղծագործական հունձքը մշակույթի կենտրոն այս քաղաքում հարուստ է ու մնայուն: Ռաֆիկ Եղոյանի նախագծերով Լենինական-Գյումրիում կառուցվել են Անիի հազարամյակի հուշակոթողը (1962), Սբ. Ամենափրկիչ եկեղեցու զանգակատունը (1964), «Կումայրի» զբոսաշրջային հանգրվանը (1970), քաղաքի երկաթուղային կայարանը (1979), «Մայր Հայաստան» հուշակոթողը (1975, քանդակագործ՝ Արա Սարգսյան), Ավետիք Իսահակյանի (1969), Սերգեյ Մերկուրվի (1979) տուն-թանգարանները, «Արտյոմ Պետրոսյան» դիմաքանդակ-հուշարձանը հերոսի անվան դպրոցի դիմաց, այլ հուշարձաններ, բնակելի շենքեր: 1988-ի դեկտեմբերյան երկրաշարժից հետո ճարտարապետը Գյումրու վերականգնման մեծ ծավալի նախագծային կազմակերպչական աշխատանքներ է ծավալել: Նրա նախագծով, իր որդու՝ Գարեգին Եղոյանի հետ վերակառուցվել է երկրաշարժից քանդված Սբ. Ամենափրկիչ եկեղեցին:
Գյումրու ճարտարապետական դիմագծի կերտման գործում անգնահատելի ավանդ ունեցող վարպետի գեղանկարները նոր բացահայտում են եւ ըստ գնահատումների՝ ոչ պակաս արժեքավոր: Դրանք տոգորված են հարազատ քաղաքի նկատմամբ անպարագիծ սիրով: «Գյումրին ինձ համար, իմ ընտանիքի համար սրբավայր է, եւ այդ մեծ սերը չի թողնում մտքով եւ ֆիզիկապես պոկվել նրանից, նրա ճարտարապետությունից ու նրա մարդկանց բնորոշ էությունից»,- ասում է նաեւ իր երջանիկ ընտանիքի դերը կարեւորող վաստակաշատ ճարտարապետը:
Ռաֆիկ Եղոյանի «Տարիներ անց» խորագրով գեղանկարչական ցուցահանդեսը Գյումրու «Գալերի 25»-ում (Հաղթանակի պողոտա 25) բաց կլինի մեկ ամիս:
ԳԵՂԱՄ ՄԿՐՏՉՅԱՆ
