Հաղորդավար Աիդա Ներսիսյանի ՖԲ էջից, –
Աշխարհի ամենակարճ պատմվածքի (6 բառով) հեղինակի անունը հայտնի է բոլորին՝ Էռնեստ Հեմինգուեյ:
Իսկ ո՞վ է ամենակարճ նամակի հեղինակը:
Ասում են, Վիկտոր Հյուգոն բնավորությամբ չափազանց վճռական է եղել: Որպեսզի ինքն իրեն ստիպի ժամանակին ավարտել «Թշվառները» վեպը, քանի որ հրատարակչության հետ նախնական պայմանավորվածություն է ունեցել, նա կտրել է գլխի մազերի և մորուքի կեսը ու մկրատը դուրս նետել: Այդպիսով, ստիպել է իրեն տնից դուրս չգալ այնքան ժամանակ, մինչև մազերը աճեն: Այդ ընթացքում հասցրել է վեպն ավարտել: Եվ երբ գիրքը լույս է տեսել, իմանալու համար ինչպե՞ս է ընթանում վաճառքը, հրատարակչին ուղարկել է բացիկ՝ ❓նշանով: Հրատարակիչն էլ՝ առանց երկար մտածելու, մեկ ուրիշ բացիկով նրան պատասխանել է՝ ❗️
Մեկ այլ իրական դեպք՝ դպրոցական տարիների իմ սիրելի գրողի կյանքից:
Մի անգամ՝ Պրուսիա մեկնելիս, հարցաթերթիկ լրացնող ոստիկանը Հյուգոյին հարցրել է.
– Ինչո՞վ եք զբաղվում:
– Գրում եմ,-պատասխանել է գրողը:
– Ես Ձեզ հարցնում եմ՝ ինչո՞վ եք վաստակում Ձեր օրվա ապրուստը:
– Գրչով,- հանգիստ պատասխանել է գրողը:
– Ուրեմն, այդպես էլ կգրեմ՝ «Վիկտոր Հյուգո, գրչի առևտրական»:
ՇՆՈՐՀԱՎՈՐՈՒՄ ԵՄ «գրչի առևտրականներին», գրական աշխարհի ընկերներիս Գրողների միջազգային օրվա կապակցությամբ:
